Vawiin khan Chief Minister Pu Lal Thanhawla chuan Mizoram Hindi Training College (MHTC), Durtlangah kumin atana zirlai thar 94 lawmna Fresher's Social buatsaih chu khuallian niin a hmanpui.

Chief Minister chuan India khua leh tui tan Hindi thiam chu a pawimawh in, thangthar zingah a pawimawhna hria leh thiam duh an awm chho zel chu lawmawm a tih thu a sawi a. Hnamdang zinga awm nikhuaah tawng hriat thiamloh chuan inkiltawih te a awl thei viau a, chu chu hmasawn theihna laka min daltu a nih avangin tawng thiam a pawimawh a ni tiin Pu Lal Thanhawla chuan India ram chhungah chuan Hindi thiam te tan thil tih a awlsam zawkin, mahni mimal thiamna leh eizawnna kawngah pawh hmasawn a awl phah zawk tur a sawi a. Sawrkar pawhin Hindi thiamna kawnga Mizoramin hma a sawn theih nan theihtawp chhuaha hma a lak thu te , sawrkar laipuia mi pawimawh te pawh hmu a ke pen a nih tawh dan te a sawi bawk a. MHTC zirlaite chu Chief Minister chuan Mizorama Hindi thiamna tipungtu an lo nih ngei theih nan an zirlaiah theihtawp chhuah tura chah in, kawng engkimah an thiamna leh hriatna tipung tura beiin, an vela thil thleng te ngaihven a, mi rawn tlak leh vengva tak, midang zirtir chhawng thei tura mi hmantlak an nih theuh a duh sak thu a sawi a ni.

MHTC Fresher's Social hi Pu Zarzosanga, Director, Higher & Technical Education chuan kaihhruaiin, an Principal Dr. Louis Hauhnar chuan college chungchang report a pe a. Pi R. Lalthlamuani, Associate Professor chuan lawmthu sawiin hun a khar a ni. He programme-ah hian ICFAI Vice Chancellor leh MHTC hotu hluite bakah khawtlang hruaitute an tel bawk.

MHTC hi October ni 15, 1975 khan Mizoram Sawrkar leh Central Institute of Hindi, Agra tangkawpin Mizoram Hindi Training Institute tiin an din a, a din chhan ber chu Hindi zirtirtute thiamna belhchhah a, a bik takin Middle School Hindi zirtirtuten tha zawka zirtirna an pek theih nan a Hindi ziak leh tawng lama tihhmasawn a ni a. He Institution hi kum 1996 khan Mizoram Hindi Training College tia a hming thlak tak a ni a. Din tirh a nih atangin zirlai 2000 chuan an zirchhuak tawh a ni. Kum 2003 khan MHTC hian National Council for Teachers' Education (NCTE), Bhubaneshwar Centre atangin phalna a hmu a, course leh syllabus zawng zawng pawh NCTE inkaihhruaina anga kalpui a ni. College-ah hian Associate Professor pahnih, Assistant Professor pasarih leh School Education Department atanga attached lecturer pathum zirtirtu thawk lai mek an awm a ni.