Higher & Technical Education Minister Pu R.Romawia chuan vawiin khan Govt T. Romana College Academic Building sak thar a hawng.
Pu R.Romawia chuan Mizorama zirna than chhoh dan sawiin missionary ten zirna bul an tan hnuah khawtlanga mi thahnemngai leh inpe ten zirna in hrang hrang an din a, mi hausa in phal ten college din nan an sum leh pai te thawhin, thawhlawm thawhtute hming pu in college a ding chho va, T. Romana College pawh chutianga bul tan chho an nih thu a sawi a. Mipui zawng zawng intawm zirna in a than len zel nan thahnemngai tlang tura mi tinte sawmin, mimal hlawkna ngaihtuaha institution ram nek zawnga che lo turin a chah a ni. College zirlaite fuihin Higher & Technical Education Minister chuan intlansiakna khawvela cheng an nih hriain intlansiak rilru an put a ngai, a ti a, zirlaia thiam thei ti tha peihlo nih ai chuan tumruhna leh taimakna chu hlawhtlinna bul a ni zawk tih hre turin zirlaite chah a ni. College hmun tha tak an nei chu thawktute inpekna bakah bialtu MLA Pu R.Vanlalvena thahnemngaihna leh khawtlang hruaituten hmasawn zel tura rilru zau pua thahnem an ngaih vang nia a hriat thu sawiin Govt. T.Romana College in hma a sawn zel theih nan Minister Pu R.Romawia chuan duhsakna a hlan a ni.
Aizawl South-I bialtu MLA Pu R.Vanlalvena pawhin thu sawiin T.Romana college in zirna changtlung tak leh zirtirtu tha tak tak an nei chu lawmawm a ti a, zirlaite pawhin an vanneihzia hria a thahnemngai taka lehkha zir turin a chah. Tun hma deuhah kha chuan India ram hmun hrang hrangah Mizo IAS officer an awm thluah thin a, tunah erawh kan ram chhungah ngei DC leh SP bakah officer lian dangte pawh hnam dang an ni ta fur hi Mizo ten zirna kawngah tan kan lak nasat a tul zia a tilang a, Mizo ten kan hnam tan, kan aiawha ding tur IAS officer kan mamawh a ni, a ti. Kan hma hun hi pen khat pawh kan hre lo a, chuvangin kan boral lohna turin kan nun darkar tin kan ven fimkhur a ngai a ni, tiin Pu R.Vanlalvena chuan zirlai kalkhawmte a fuih a ni.
Govt. T.Romana College building thar “Academic Building” hawn tak hi RUSA infrastructure grant an hmuh atang leh college-a sum an neihsa te hmanga sak a ni a. Chhawng ruk awmin a dung ft 60, a vang ft 35 a zau a ni. Kum 2016 October ni 22 khan sak hna thawh tan a ni a. A chhungah hian smart classroom 7, conference hall, computer centre, language lab leh Free Legal Aid Clinic te dah a ni. Building thar a hawn bakah H&TE Minister hian building hawn tak kawtah hian thing a phun nghal bawk a ni.
Building thar hawnna inkhawm Associate Professor Pu CVL Tlanhlua kaihhruaiah hian RUSA hotute, Republic Veng khawtlang hruaitute leh tlawmngai pawl hrang hrang hruaitute an tel a. H&TE Commissioner Pu Asish Kundra bakah an college Principal Dr.Lalrintluanga ten thu an sawi a, Govt. T.Romana college RUSA Coordinator Dr. Malsawmliana’n technical report a pe a, Internal Quality Assurance Cell (IQAC) Coordinator Dr. Jennifer Lalbiakdiki’n lawmthu sawiin hun hnung a khar a ni.
