Vawiin hian Minister of State Pi Vanlalawmpuii Chawngthu leh Hrangturzo Bialtu MLA ni bawk chuan a bial chhunga hmasawnna hnathawh thenkhatte a enkual a. Hnathawktute nen inkawm hona te a neih pui.

Pi Vanlalawmpuii Chawngthu hian zing lamah khan Tuichang lei (Bridge) dawh thar tur hnathawh mek tlawhin an hmalak tawh chin leh hmachhawp mek te a thlir pui a. He lei hnathawh mek enkawltu Engineer te leh hnathawktute hnenah Tuichang chhak lama mipui zawng zawngte chak lakna kawngpui ber, lei pawimawh tak a nihzia hria a, a hun taka zo ngei tura thawk turin a chah a. Tuna Bridge hman mek hi la tha mah se kum 30 chuang a nih ve tawh avang leh tunlaia Truck lian zawkte tana zawh a him tawh loh avangin Lei thar tha zawk neih vat chuan nasa takin kawngro a su dawn a ni, a ti. He mi hnu hian PWD Engineer te nen Lungchhuan pan lehin Khankawn atanga Lungchhuan panna kawngpui hnathawh mek a en leh a, hmalak tawh chin leh hmabak la awmte chipchiar takin thawktute nen an sawi ho a ni. Minister in Tuichang lei leh Lungchhuan kawng a tlawh hi Pu LN Tluanga, EE, PWD leh thawktu dangten an tawiawm ani.

He mi hnu hian Pi Vanlalawmpuii Chawngthu hian N. Vanlaiphai Tourist Lodge ah N. Vanlaiphai Civil SDO huam chhunga Department hrang hrang thawktute nen a bial chhunga hnathawh kal lai mek te leh hmachhawp awmte an thlir ho leh a. Sawrkar hnathawkte chu mipuite tana thawk, mipuite vanga awm an nih zia hriaa, an hna thawh tinrengah complaint ngai lo, umzui ngai lo leh rinawm taka thawk thin turin a fuih a ni. Tin, a bial chhunga Contractor hnathawk mekte pawh danin a phut anga dik taka an hnate lo thawk turin a hrilh a, a tul ang zela puih a inhuam thu hrilhin mipuite pawh hnathawktute lo thawhpui thiam turin a ngen a. Hnathawh tha lo a awm a nih chuan a tul dan ang zela umzui a inpeih reng thu a hrilh a ni.