Vawiin khan World Vision India, Chhimtuipui ADP leh All Mizoram Farmers Union (AMFU) te tang kawp huaihawtin Lawngtlai Press Club-ah Farmers Producer Organisation bul tanna hun hman a ni.
He hun hi WVI Co-Ordinator Pu Lalramliana Ngente chuan a kaihruai a. NABARD Lunglei atangin kut hna thawktute tana NABARD hnuaia hamthatna awm thei hrang hrang ngaihthlak a ni a. District Agriculture office atangin fu leh vaimim chingtute tana hriat tur pawimawhte ngaihthlak niin, Divisional Horticulture office atangin theihai, serthlum leh zikhlum hlawk taka chin dan leh hriat tur pawimawh dangte ngaihthlak a ni a. KVK Lawngtlai atangin thlai thar chhuahte hralhna kawnga thil pawimawhte ngaihthlak a ni bawk. He’ng department hrang hrang atang hian mi thiamte’n kal khawmte hnenah zirtirna pein, subject tinah hian zawhna leh chhanna hun hlawk tak hman ho a ni bawk.
World Vision India leh AMFU tang kawp chuan Farmers Producer Organisation dinin, he pawla inziak lutte chu World Vision hian kawng hrang hrangin a enkawl zui dawn a. World Vision India, Chhimtuipui ADP hian kumin 2018 hian kut hna thawktu 150 hnenah tanpuina pe tawhin, hnim samna khawl an pek bakah, tui lak leh a dah khawlna te an siamsak a, sangha dil te pawh an laihsak bawk. Kum thar 2019 atan kut hna thawk mi 210 thlang chhuak leh tawhin, chu’ngte chu theih tawpa tanpui an ni ang a. Thlai chin kawnga an mamawh tur angte ngaihtuahsakin, an thlai thar chhuahte hlawk zawka an hralh chhuah theih nan a tul ang zelin hma an lakpui ang a, phai lama company te pawh hemi atan hian dawrsak an tum bawk a ni.
