Vawiin chawhma dar 9:30Am khan Gov't Higher Secondary School-ah MBSE buatsaihin Integrated Evaluation Scheme (IES)  Software Training  Higher Secondary School leh High School Zirtirtu te tan buatsaih a ni.

He IES hi 2016-17 Academic session atang khan High School-a hman tan niin, 2017-18 Academic session atang khan Higher Secondary School-ah hman tan a ni ve thung a. IES hi Mizoramin zirnaa hmasawnna kum tam tak kan lo nghah tawh tihhlawhtlinna tur tha tak pakhat a ni a. Tunah hian Mizoram zirnaah mellung  pawimawh tak  phun tan mek a ni. Kalphung pangngaia, kum tawp vawi khat exam awm thin chu tibovin, mark 80 Final/Board exam leh mark 20 internal exam neih a ni ta zawk a. He scheme hnuaiah hian kum tluanin naupangten an zirlai thlah miah lova an zir theih nan test leh exam pawimawh tak tak school in a an tehna tur hi neih reng a ni tawh a. Zirna bakah hian naupang hmasawnna leh hriatna tizau thei tur te, an hriselna lam ngaih pawimawh nachang an hriat theih nan te, General Studies, Work Education leh Physical & Health Education te pawh neih tel a ni bawk.

Mizoram pumah IES hmanga data lakkhawm leh lo sawrkhawm dante a rualkhai lehzual theih nan, IES software hi buatsaih a ni. Hei hian Mizoram kil tinah awmze nei zawk leh naupang internal marks pek danah data format inang tlang taka kan kalpui theih nan a pui hle dawn a ni.

Vawiin IES Software Training hi Pu R. Lalthlamuana, Regional Officer, MBSE Regional Office, Lunglei leh Pu“Michael Lalrinmawia, Academic Officer, MBSE ten an pe a ni.