Institute for Human Development, New Dehi leh Planning & Programme Implementation Department, Govt. of Mizoram tangkawpin a buatsaih, Mizoram Human Development Report 2013 chu vawiin khan Legislative Assembly Conference Hall-ah Chief Minister Pu Lal Thanhawla chuan a tlangzarh.

Tlangzarh inkhawmah Chief Minister chuan kum 2011 January a Mizoram Human Development Report chungchang workshop, Tourist Lodge, Chaltlang-ah buatsaih a nih tawh thu sawiin, chu workshop buatsaihtute bawk Institute for Human Development, New Delhi in HDR 2013 of Mizoram a hmasa ber atan a tichhuak hi a lawmawm hle a ni a ti a. Human Development Report hi United Nations Development Programme (UNDP) in kum 1990 atang daih tawh a alo kalpui tan thu sawilangin, India dinhmun erawh 136-na niin a chhuanawm loh hle a ni a ti a, rampum anga chona lian tak a tling a ni a ti.

Chief Minister chuan Mizoram sorkarin Annual Statistical Handbook tihchhuah thin anih thu sawiin, tun hnaiah Annual Economic survey Reports tihchhuah a ni a ti a. Tuna Report tlangzarh tak hian policy ruangam siamnaah a tangkai hle a beiseiawm a ni a ti a. Mithiam tak takte buatsaih a nihna ah sorkar kawng kawhhmuhtu anih ngei a beisei thu a sawi a. A buatsaihtu, Mizoram Planning department leh Professor Alakh N.Sharma, Director, IHD, New Delhi ten district tin dinhmun chipchiar taka report an buatsaihnaah lawmthu a sawi bawk a ni.

Chief Secretary Pi L.Tochhawng pawhin thuhma sawiin, HDR siam tur hian IHD New Delhi leh Mizoram sorkarin kum 2008 khan MoU an ziah thu a sawi a. Report hi Mizoramin kan thatpui tur leh hmasawnna kawng min kawhhmuhtu tur a ni tiin, India ram pumah tehfung hrang hrang hriselna lam te, zirna, GSDP leh Per Capita Income te leh a dang tam tak hmanga Human Development Index hi siam thin anih thu a sawi a. Mizoram chu Human Development Level-ah a sang ber a ni tih Report ah tarlan a ni hi a lawmawm takmeuh a ni a ti.

Human Development Report hi document huam zau tak, mihringte dinhmun leh hmasawnna tura mamawh hrang hrang, hriselna lam te, zirna te, sum lakluh te, hmeichhe chungchangte, ami cheng hrang hrangte dinhmun leh khawtlang leh ei leh bara lam chungchangte a huam vek a ni. Report buatsaih tur hian district tina khawpui leh thingtlangah chhungkaw 3670 hnen atangin data lakkhawm a ni.

Report tlangzarhna inkhawmah hia Pu H.Liansailova, Vice Chairman, Planning Board pawh a tel a ni.