Nizan (20.9.2018) khan Aijal Club ah Chief Minister Pu Lal Thanhawla chuan ni thum awh tur Mizoram International Short Films Festival chu a hawng. He Film Festival hi Innovations India in NEDP bultumin I&PR Department kaltlanga a buatsaih a ni a. Bollywood filmstar Gulshan Grover leh Pooja Ballutia te leh Bollywood Director Umesh Shukla te chu he film festival atan hian sawm an ni.

Chief Minister Pu Lal Thanhawla chuan Film Festival Mizoramin a huaihawt thin ta chu lawmawm a tih thu sawiin, ram hrang hmun hrang a chengte kan nun dan ka inzir tawn sakna, inpumkhatna hmanrua tha tak a ni, a ti a. Film siam chu talent phochhuahna tha tak a nih thu Chief Minister chuan sawiin, Mizo zingah state pawn a kal a mahni inzirna hun nei an tlem hle chungin talent tha tak tak nei inzirmi filmmaker an awm chu a lawmawm a ni, a ti a. Film Festival chu Mizo zinga film siam lama tuimite leh mithiamte tan inzirna hun a nih a, an hma hun zel atan remchanna tha tak a thlen ngei a beisei thu a sawi a. Film Festival chuan inpumkhatna a thlen ngei a beisei thu leh film khawvelah Mizoramin thui zawka ke a penna ni ngei se a duh thu a sawi.

Short Film Festival hi 22.9.2018 thleng neih a ni dawn a. Film tawi inelna atan hian India ram chhung chauh nilo khawvel hmun hrang hrang atangin film 82 lut in, chung zinga 25 chu Mizo kutchhuak a ni a. Naktuk tlai hian he festival atana sawm bik Filmmaker Pu Umesh Shukla chuan film siam lama tui mite tan Film Directing chungchang zirtirna a nei dawn bawk a ni.  Film Festival hawnna ah hian short film ngaihsan hlawh tak, Gulshan Grover channa "Forbidden" chu chhuah nghal a ni. Hei hi India rama chhuah hmasak ber tum a ni bawk.