Chief Minister Pu Lal Thanhawla chuan hun rei tak atanga Mizoramin a suangtuah tawh leh puitling tura a nghahhlelh tak India rama Sainik School 27-na Sainik School, Chhingchhip chu a nimin khan a hawng a. School hawnna programme ah hian Home Minister Pu R. Lalzirliana; Education Minister Pu H. Rohluna; Parliamentary Secretary Lt.Col. (Rtd.) ZS Zuala leh Pu Joseph Lalhimpuia te; Pu John Siamkunga, MLA leh bialtu MLA Er. Lalrinawma te, Chief Information Commissioner Pu Lalduhthlana Ralte bakah  Sawrkar Laipui aiawh te leh Mizoram Sawrkar Department hotulu engemaw zat in an tel bawk a ni.

Chief Minister Pu Lal Thanhawla chuan Sainik School Chhingchhip hi din a nih theih nan 1998 khan hmalakna a awm tawh a, mahse kum 10 chhung zet engmah hmalakna a awm loh hnuin 2008 kum tawp lamah khan hna hmasa berah neiin Sawrkar Laipui te dawrin theihtawpa hmalak chhoh a nih thusawiin kum tam tak atanga hmalakna lo awm tawh vawiina Sainik School hawn a ni ta chu Mizoram hmasawnna atan mellung chhinchhiahtlak tak leh pawimawh tak a ni a ti a. Hmasawnna hna hrang hrangah kuttling lova sum lak pawi sa lo leh chutiang  tum ten harsatna an siam thin laia chutiang rilru pu lova School sak a nih theih nana a thlawn a beisei nei lova ram petu Chhingchhip khawtlang, a bik takin hemi atan an ram ui lova petu chhungkua 60 te chungah Sawrkar ang leh mipuite aiawhin lawmthu ka sawi a, ram leh hnam hmasawnna atana an thil pek hi a ropui a, lawmthu kan sawi bang lo a ni, a ti.

Sawrkar thupui pakhat leh a hnathawh pawimawh tak - thalaite tana khawvel thar buatsaih leh din chungchang sawiin Chief Minister chuan infiamna lamah ruhrel leh hmasawnna siam te; eizawnna atana thalaite thiamna tihpuna ram pawn thlenga hnathawhna tur zawnsak te; zirna tha (quality education) leh ramdanga chhawrtlak zirna (export quality education)  kalpui dan kawng buatsaih leh siam te chu Sawrkarin a kal chhohpui mek thusawiin thalai te tana khawvel thar buatsaihnaah hian Sainik School pawh hi a tel a, vawiina kan hawng thei ta hi thalai te tan khawvel thar buatsaihna kawnga kan hlawhtlinna pawimawh tak a ni, a ti. Hengah te hian duhthusam ang tak tak thlen a harsa a chuti chungin theihtawp chhuaha kan hmalakna te hi a hlawhtling cho mek a, a bik takin infiamna lamah ruhrel nei tha pawl kan nih avangin kan thalaite hi infiamna khawvelah ram chhung leh ram pawn hriatin kan pholang mek a ni, a ti.

Sainik School hi sipai a luh nan chauh a pawimawh lova, khua leh tui tha chherchhuahna kawnga hmanraw pawimawh tak a ni, kawng tinrengin nun ulukna te a zirtir a, Sainik School chhuak te hi sipai ah chauh nilo kawng hrang hranga ram tan mi thawhhlawk leh tangkai an ni thin a ni, a ti a. Mizo te hi India khua leh tui tha tak ni turin kan awmna ramah theuh Zofate hi rinawm takin kan awm tur a ni, a ti. Rambuai hmain Mizote chu sipai ah a officer lam thlengin kan tam thin a, khatih hunlaiin kan Meitei unaute chuan officer 3 awrh an nei a mahse Sainik School an neih vangin tunah chuan officer za tel an nei tawh a, keini erawh Rambuai avangin sipai lakah kan rilru a hel a chuvangin sipai ah lut an tlem tial tial a, mahse tunah chuan sipai chu kan tam thawhkhat leh tawh a, mahse a officer lamah kan tlem ta a, heng kawngah te hian Sainik School Chhingchhip lakah beiseina sang tak kan nghat a ni, a ti a. Hmeichhia te pawh he sikulah an luh theih nana kawng ruahman turin Ministry of Defence hnenah rawtna thlen a nih tawh thu sawiin School a changtlun chhoh zel nan Mizoram Sawrkarin theihtawp a chhuah tur thu a sawi tel bawk a ni.

Chief Minister hian Sainik School atana a thlawna ram petu chhungkua 60 te hnenah chawimawi thuziak buatsaih a hlan nghal bawk a ni.

Home Minister Pu R. Lalzirliana chuan Chief Minister in kum tam tak atanga kawng hrang hranga Sainik School din a nih theih nana a hmalakna te chu vawiinah a takin ramin a hmuh thu sawiin vawiin hi hun lawmawm tak a ni, a ti a. School tana ram petute chungah lawmthu sawiin duhsak an phu tih a sawi a. Hun lokal zel turah Sainik School hian sipai officer tha tak tak leh ram tana min chhenfakawm leh tangkai te a chherchhuah a beisei tih sawiin Sainik School hi Mizoramin kan mumang neih, a tak lo thleng a ni, a ti bawk.

Parliamentary Secretary Lt. Col. (Rtd.) ZS Zuala pawhin thusawiin a dinna atana kawng hrang hranga a sulsutu ber Chief Minister, sikul din a nih theih nana ram petu, hmalakna te theihtawp chhuahpuitu Home Department leh Rajya Sainik Board leh Chhingchhip khawtlang leh tlawmngai pawlte chungah lawmthu a sawi a. Sainik School sak a nih theih nana hma kal chhoh dan te a sawi tel bawk a ni.

Sainik School hawnna programme hi Pu Lalrinliana Fanai, IAS, Commissioner & Secretary chuan a kaihruai a, Rev. Lalnunzira, Chhingchhip Pastorate in Pathian hnenah inhlanna hun a hmang a, School Principal Major Varun Bajpai in inlawmna thu sawiin School chanchin tlangpui leh hma bak la awm te a tarlang a. Hindustan Prefab Limited CMD Pu Rajesh Goyal Technical Report sawiin school sak dan chanchin a tarlang a. School enkawlna atana din Local Board of Administrators a, Chairman a ruat Maj. Gen. Upendra Baxi, IGAR (East) aiawhin Officiating IGAR(East) Brig. K.P.Singh leh ram petute aiawhin Pu Lalthakima ten thu an sawi bawk a. Joint Secretary, Home Department in lawmthu sawiin hun a khar a ni.  

Sainik School Chhingchhip hi India rama Sainik School 27-na leh Hmarchhaka Sainik School 4-na tur a ni a. He School sak nan hian Chhingchhip khaw chhungkaw 60 in zawngnadawmna phut maih lovin a thlawnin ram hectare 212( bigha 1584) velah zau an pe a. School sak hna hi 2012 khan tanin March 2017 ah peihfel thawhkhat a ni, building thenkhat la sak mek awm mahse building tam zawkte chu sak zawha tawh anih avangte, Sainik School Society in hmun hmate an endik hnuin academic session tan anih theih thu an sawi avangte leh Ministry of Defence in tan phalna an pek avangtein School hi kumin academic session 2017-2018  ah zirlai cadet 60(Pawl VI zir tur) admit in, tan a ni ta a ni. Ruahman ang chuan Sainik School ah hian Pawl XII thleng hawn choh zel a ni dawn a, zirlai naupang 600 bawr vel dawl zo turah siam leh ruahman a ni.

Sainik School sak nan hian 13th Finance Commission atangin cheng vaibelchhe 45 leh Non-Lapsable Central Pool of Resources (NLCPR) atangin cheng vaibelchhe 50.64 ruahman niin heng sum hmang hian sak a ni.

School satu tur atan Sawrkar Laipui Work Agency pakhat, Hindustan Prefab Limited ruat niin anni hian Prasad & Co. Hyderabad hnenah a sak hna hi an pe a ni.  Tun academic session atan building hman tur chu peihfel ni tawh in a bak dang te pawh sak zawh kumin December ah hian peihfel hman beisei a ni.

Sainik School Chhingchhip Principal turin December 2016 khan Major Varun Bajpai a dah a ni a, December 2016 ah a hna a zawm a chumi hnua 2017-18 session tan anih thei nan theihtawp a chhuah nghal a. Amah hi Col. Inderjeet Singh, Army Education Corps in thlak dawn a ni.

He School a lut tur naupang 60, All India Sainik School Examination a hlawhtlingte te chu May thla tir kan admit fel an ni tawh a.  Zirtirtu 6 lak zinga 3 chu Mizo an ni a, hnathawktu dang 13 lak an ni tawh bawk a. A ram petu chhungkaw zing atangin mi 4 chu hna thawktu atan lak an ni a.

Sainik School Chhingchhip hi India a hmeichhe naupang luh theihna Sainik School hmasa ber a nih theih nan ruahman leh rawtna te chu Ministry of Defence a thawn mek a ni a, an ni hi thutawp siam theitu an ni a. Sainik School enkawlna atan Local Board of Adminstrators ruat an ni tawh bawk a ni.