Vawiin khan Lunglei DC Pi Lalzarmawii, IAS chuan North East Region Livelihood Project(NERLP) leh Indian Institute of Entrepreneurship (IIE) Guwahati te tangkawpa buatsaih, ‘Cluster Intervention Programme in Handloom in Lunglei’ chu Hausiampa Hall, Haulawngah a hawng. 

Pi Lalzarmawii chuan NERLP leh IIE te’n Mizo hmeichhia eizawnna ngelnghet neilo te tana puantah hmanga eizawnna rawn siamsak a, chawikan an tum chu lawmawm a tih thu a sawi a. Lunglei District chhungah puantah leh puanthui design nalh leh mawi, khawl changkang tak hmanga training buatsaih a ni tur chu kan vanneih hle a ni, a ti. Kalkhawm te chu uluk leh taima taka zir tura chah in, Mizo puan hi India ram mai bakah ramdangah te pawh mawi an tih thu a sawi a, man man zawk leh hlawk zawka hralh thei tura inpuachah theuh turin a chah bawk a ni. 

Pu Lalfakmawia Co-ordinator (L&RM) NERLP chuan report pein, puantah leh puanthuia eizawng te tih hmasawn chu IIE nena an  thil tum a nih thu a sawi a. Lunglei District chhunga khaw 8 Mausen, Haulawng, Mualthuam 'N', Sekhum, Ramlaitui, Kanghmun 'S',  Zote leh Chhipphir te atangin puantah zir tur mi 15  theuh thlanchhuah te an ni a. Heng mi 120-te hi  Training Center 4 – Haulawng, Sekhum, Ramlaitui leh Chhipphir ah te training pek an ni dawn  ani. 

Shashank Chaudhari, Project Officer, IIE, Guwahati pawhin thu sawi in puantah leh puanthui zirna hi kum khat leh a chanve chhung neih a ni anga, heng mi 120 thlan chhuah te chu Jacquard leh Stitching Machine (design leh thui khawl) hmanga training neih tir tum an ni, a ti bawk. Training tur te hi Guwahati atangin mi pali te’n an vil anga, Mizo master trainer pathumin an pui bawk ang.

He handloom training hawnna inkhawm hi B. Biakkima, Area Coordinator, Lunglei Block chuan kaihruaiin, Dr. Kendy Vanlalhriatpuia, District Project Manager, NERLP, Lunglei District, VCP Haulawng, VCP Sekhum, VCP Ramlaitui, VCP Mualthuam 'N' leh VCP Kanghmun 'S' te’n thu an sawi bawk a ni.

Pi Lalzarmawii hian Mualthuam 'N'-a NERLP hmalaknaa Community Development Plant hnuaia tui dahkhawlna litre 2,60,000 leng tura sak mek chu a hmunah a tlawh nghal bawk a ni.