Vawiin khan Health & Family Welfare Minister Pu Lal Thanzara chuan School of Nursing, Christian Hospital Serkawn-a General Nursing & Midwifery (GNM) zirlai pass chhuak tharte lawmpuina, Graduation Ceremony chu Khuallian niin a hmanpui a. He Hospital-a B. Sanghnuna Conference Hall pawh vawiin vek khan a hawng nghal a ni.

Pu Lal Thanzara chuan nurse graduate tharte chu a lawmpui thu sawiin, tun dinhmun an thlen theih nana rilru leh tha tam tak sengtu an zirtirtu leh an nu leh pa te hre reng tura a duh thu a sawi a. Zoram chhung leh pawn, India ram pawn thleng pawha hna an thawh hunah, an thutiam sawi rual te chu zawm tlat tura a duh thu a sawi a ni. Nurse hna chu hna zahawm a ni tiin, graduate tharte chu ruihtheih thil leh zuk leh hmuam laka inthiar fihlim turin a chah nghal a ni.

Khuallian chuan sawrkarin mipui hriselna a ngaih pawimawh thu sawiin, hriselna atan kawng hrang hrangah hma chak takin hma a la mek zel a ti a. Chutih lai chuan mipuite pawhin, an lo hrisel zawk nan, ei leh inahte, zuk leh hmuam ahte an fimkhur thara, insumna lama tan an lak a ngai hle a ni, a ti. School of Nursing, Christian Hospital Serkawn-te hman tangkai turin cheng nuai khat a pe bawk a ni.

He Graduation Ceremony hi CHS Medical Superintendent Rev. B. Laldinliana chuan a kaihruai a. Principal Pi Vanlalthlengliani chuan school chungchang report pein, GNM pass chhuak tate chu an vaia mi 19 an nih thu leh batch 42-na an nih thu a tarlang a. Pass chhuak tharte hnenah graduation certificate pek a nih bakah Mizoram Nursing Council-in exam a buatsaiha zirlai titha te hnenah lawmpuina sem a ni bawk.

Vawiin vek khan Health & Family Welfare Minister Pu Lal Thanzara chuan Christian Hospital Serkawn-a B. Sanghnuna Conference Hall sak thar chu a hawng nghal a. He Hall sak nana tanpuina petu Pu B. Sanghnuna fapa, Pu David Lalchhuanawma chuan chhungkaw aiawhin thu a sawi a ni. B. Sanghnuna Conference Hall sak nan hian cheng nuai 13 bawr vel sen niin, Pu B. Sanghnuna te hian Hospital tanpui nan cheng nuai 10 an pe a ni.