3556/2023-2024

Dated Aizawl, the 30th January, 2024: Vawiin khan Chief Minister Pu Lalduhoma chuan a office-ah Mizo thalai ram danga hnathawka thawnchhuak thin pawl, Mizoram Overseas Placement Forum hruaitute a kawm.

Chief Minister chuan, an harsatna sawi te leh an hmalakna kawnga sawrkar dan dinglai te chu a lo bihchian tur thu a hrilh a. State sawrkarin in hman theih dan a siam theih leh theih loh te pawh kan lo en dawn nia, tiin a chah a ni.

Mizoram Overseas Placement Forum hruaitute hian Chief Minister hi lawmpuina an hlan a. Mi an thawn chhuahna tur ram te dan pawimawh hre sa zela hma la thin an nih thu leh an thalai thawnchhuah te chu lehkha zir sang lutuk lo an tam zawk nain Mizoram tan sum leh pai tam tak an thawk chhuak thin a ni, an ti. Chutihlaia engemaw thil ho te emaw thuthang diklo vanga harsatna an tawh zeuh zeuh thu te pawh an sawi a ni. Mizoram sawrkarin dan thar a siam, Mizoram Private Placement Agency Act hnuaiah in register thlapin mi thawnchhuak thin mah se, tunhnaia harsatna an tawh leh tak dan chungchang te pawh an thlen a ni.