3136/2023-2024

Dated Aizawl, the 20th December, 2023: Vawiin khan Chief Minister Pu Lalduhoma chuan a pisaah Mizoram People's Forum General Headquarters hruaitute chu a kawm a. Sawrkar tha siam tura MPF ngaihpawimawh thil hrang hrangte leh sawrkar hmachhawp awm mekte an sawiho.

He hunah hian Chief Minister chuan, sawrkar tha, langtlang leh eirukna awm lo din tura hmalakna an kalpui tan tawh te leh hmachhawp an neih hrang hrangte a tarlang a. MPF te chu inthlanna thianghlim a awm theihna lamah chauh nilova, sawrkarna thianghlim leh langtlang a awm theih nana an thahnemngaihna te pawh hrilh hria a, inthlahrung lova sawrkar enzui zel turin a sawm a ni. Sawrkar chuan Project Monitoring Committee chak tak a siam dawn a, chutah chuan recognised party zawng zawng aiawhte bakah MPF, MKHC leh NGO aiawhte pawh an tel dawn a ni. A tul angin thiamna bik nei te pawh an awm bawk ang. He Committee hi State Level atanga Village Level thlengin din a ni dawn a. He committee remtihna lo chuan contract hnathawh hun pawhsei te, contract man ennawn (revised) te a theih tawh dawn lo a ni. Tin, ruihhlo, kuva ro leh dan lova bungraw tawlhruk awm thin te hi tihtawp hmiah tumin kan bei dawn a, zu leh ruihhlo vanga chhungkua leh khawtlanga buaina siam chingte thleng hian sawrkar chuan a umzui zel dawn a ni, a ti. Hei bakah hian Mizoramin a la neih ngai loh Investment Policy an duan mek thu leh chumi hmanga Foreign Company lian tak tak te hip luh an tum dan te pawh Chief Minister hian a lo hrilh a ni.

Rev. Lalramliana Pachuau, General Secretary, MPF chuan MPF ten sawrkar laka an beisei ber chu sawrkar tha, sawrkar langtlang leh eirukna awm lo sawrkar neih a ni a. Chung thilte chu i hnena rawn thlen turin kan rawn kal a ni, tiin an thil beisei te Chief Minister hi a hrilh a. An theih tawpin sawrkar an thlawp zel dawn tih a hrilh a, hun reilote chhungin a tha zawnga thil inthlak hmuh tur a awm tih sawiin, an lawmin an phur hle tih a tarlang.

He hunah hian MPF hruaitu dangte pawhin Chief Minister thar an lawmpuina leh sawrkar tharin hma la se an duhna thenkhat te an sawi  hlawm a ni.