No.3758/2021-2022

Aizawl, the 22nd January 2022 : Chief Minister Pu Zoramthanga’n vawiin khan Mizoram Police din tan ni Raising Day champhaphak vawi 50-na puala programme Vanapa Hall a buatsaih chu khuallian niin a hmanpui a, Home Minister Pu Lalchamliana pawhin he hun hi khualzahawm niin a telpui. Vanapa Hall a programme hman zawhah Chief Minister chuan Mizoram Police hmunpui a Mizoram Police kum 50 tlin hriatreng nana Mizoram Police Monument phun chu a khuhhawng bawk a ni.

Chief Minister Pu Zoramthanga chuan Mizoram Police in kum 50 hmel a hmu ta chu ropui a tih thu sawiin state kan nih hnu leh remna leh muanna kan neih hnuin Mizoram Police pawh lo thang chhoin kawng tin rengin hma a sawn zel hi a lawmawm a ni, a ti a. Kum 50 chhungin Mizoram Police ten an hnathawh dan tihthat kawnga hma an lak nasat thu sawiin training kawngah te, sualna hrang hrang dona kawngah te, mipuite tana hnathawh leh inpekna kawngah te, ram tana nunna hial hlan an awm te leh sports lama hma in lakna te hian in hlawhtlinna leh in inpekna tilang chiangin sawitur tam tawk leh sawi tham a awm a ni, a ti.

Chief Minister chuan khawvel pumpui ina kan hneh loh hripui kan buaipui mek a, kan duh emaw kan duh lo emaw min tuam vek a, Sawrkar lian leh ropui te pawhin tihngaihna an hre bik lova, mahse chumi karah chuan kan awm ang ang leh keimahni inah kan tih tur ang ang kan tih a ngai si a. Hripui hi Pathianin khawvel chunga thleng tura a rel a ni a, thil tum a nei a, chu a thil tum chu kan hriat leh kan hmuh thiam a pawimawh hle a. Thil lo thleng te hi kan tidanglam thei lova amaherawhchu khami do tur leh khami laka keimahni leh keimahni hi kan intidanglam thei a ni tih hi kan hriat a tul hle a ni, a ti.

Sawrkar chuan Sawrkar hnathawk leh Police te indaih lohna a hriat thu sawiin Chief Minister chuan hripuiin kan sum leh pai dinhmun a nghawng nasat avangin a pawimawh zual pawh kan hnawhkhat thei lova. Mahse kan hun tawn ang zel leh thil lo thleng ang zela kan insiamrem a ngai angin, thil thleng te ang zela mahni insiamrem leh mahni inthlak hi kan inzir a ngai, a tlem ang angin tun hunah hian kan in enkawl leh hna kan thawh dan, kan in manage dan kan ngaituah a ngai a, chu chu Sawrkar hnathawk te hian ngaihtuahna kan neih a ngai a , chu chuan finna thar min pe theiin tlem deuha kan in manage dan min zirtir thei a ni, a ti.

Home Minister Pu Lalchamliana chuan kum 50 chhunga Mizoram Police hnathawh leh hmasawnna chu a chhuanawm hle nia a hriat thusawiin Mizoram Police te hi India ram mai ni lovin, khawvel huap pawha Police tha tia chhal ngam kan tling in ka hria, a ti. Tunhnaia Mizoram Police te chetchhuahna hrang hrang leh an hnathawh kawng hrang hranga thahnemngai taka an thawh hian an mahni an inchawimawi bakah ram an chawimawi thu a sawi a. Police te chu dikna hlenchhuak turin an pawimawh avangin Police zawng zawng chu dikna ngaipawimawh tur te, an tih tur leh tih lo tur chin te thliar thiama thinlung taka mipuiin an rin ngam thlapna turin an mahni pantute dawnsawn danah te, chetzia leh hnathawh danah te tan la zel turin he huna Police officer leh hnathawk kalkhawmte a chah a ni.

Chief Minister hian he hunah hian Mizoram Police kum 50 tlin puala Souvenir buatsaih chu tlangzarhin Home Minister chuan Mizoram Police Annual Report a tlangzarh thung.

January ni 21, 1972 khan Mizoram chu Union Territory a puan a ni a, he ni hi Mizoram Police din tanna niah ngaih leh pawm a ni. Mizoram Police hnuaiah hian post hrang hrang 12206 awmin chung zinga 8381 chu hnawhkhah a ni a. North Range leh Southern Range bakah tunhnai khan mamawhna avangin Eastern Range pawh din a ni a. Police Sub Division 18 awmin, Police Station 43, Police Outpost 13 a awm mek a. Mizoram Police hnuaiah hian Mizoram Police Battalion 3 leh India Reserve Battalion 5 an awm a. Kum 50 chhungin hnathawh that lawmman hrang hrang leh Medal, a vaiin 417 Police hnathawk te hian an dawng tawh a, hemi hun chhunga ram tana nunna hlan Police mi 56 an awm tawh bawk a. Police zingah vawiin thleng Covid-19 vei 1969 awmin, mi 12 in nunna an chan tawh a ni.