No.3759/2021-2022

Aizawl, the 22nd January 2022 : Vawiin khan NITI Aayog leh Planning & Programme Implementation Department, Government of Mizoram tangkawpa buatsaih 'State Level Workshop on SDGs India Index 4.0 & Multidimensional Poverty Index' chu Mizoram Assembly Annexe Conference Hall ah neih a ni.
He Workshop-a tel turte hi sawrkar SOP avangin session hrang hrangah then an ni a, Inaugural Session hi Mizoram sawrkara Secretary-te nen hman niin technical session hi Mizoram Sawrkar Department Director-te leh SDGs Nodal Officer te nen hman a ni thung. Deputy Commissioner-te leh District Research Officer-te online-in an tel bawk a ni.

Workshop hawnnaah hian Pu Lalmalsawma Pachuau, Secretary, Planning & Programme Implementation Department-in workshop-a lo telte lawmna thu sawiin, SDGs tihhlawhtlinna kawnga Mizoram sawrkar hmalakna hrang hrangte leh hmachhawpte a tarlang a, NITI Aayog-in SDGs tihhlawhtlinna kawnga State tinte dinhmun a tarlannaah Mizoram chuan nasa taka hma a sawn thu a tarlang a ni.

Workshop hi Dr. Renu Sharma, Chief Secretary, Mizoram-in hmanpuiin SDGs tihhlawhtlinna kawngah Sawrkarin hmalakna hrang hrang a kalpui mek thu a sawi a. SDGs hmalakna leh hmachhawp te lo vila umzui tu turin Committee peng hrang hrang din a nih thu leh SDGs hmalakna khaikhawm tu tur Planning Department ah SDGs Cell din a nih thu te, District tinah DC kaihhruaina hnuaia committee din a nih thu a tarlangin chak taka hmalakna kalpui mek a nih thu a sawi.

Pi Sanykta Sammaddar, Adviser, NITI Aayog-in SDGs zirchianna report tlangpui sawi zauvin Mizoram dinhmun tlangpui chu hetiang hian a tarlang a ni :
• SDGs India Index.3.0 (2020-21) tehfung hmanga ranking NITI Aayog in a tih chhuah ah chuan Mizoram hi India pumpui ah dinhmun 12-na ah a ding a, North East ah phei chuan 2-na a ni.
• (Kum 2019-20 a tih chhuah Index 2.0 Ranking ah khan Mizoram kha dinhmun 20-na ah a awm).
• Mizoram hi Hmasawn Chakber leh State Hmahruitu category ah hlankai a ni bawk a ni.
• Mizoram in a tih thatna goal te chu \SDGs Goal 1 (No poverty), Goal 3 (Good Health & Well-being), Goal 7 (Affordable & clean energy), Goal 12 (Sustainable consumption & Production) and Goal 16 (Peace, Justice & Strong Institutions) te a ni.
• Mizoram in a tih chhiatna goal te chu SDG 5 (Gender Equality), SDG 8 (Decent Work and Economic Growth), SDG 9 (Industry, Innovation & Infrastructure), leh SDG 15 (Life on land) te a ni.
• District level ranking, North East States bik atan NITI Aayog in report an chhuah ah chuan North East state-te a district 103 zingah Serchhip chu dinhmun 5-na a luah a. Mizoram district ti chhe ber chu Lawngtlai a ni a, dinhmun 79-na a luah. (2019-20 kum data hman a nih avangin district thar 3, Khawzawl, Saitual keh Hnahthial, te chu an lang lo a ni).
Adviser Pi Sammaddar chuan Multi Dimensional Poverty index chungchang a sawinaah, MPI hi India ram pumpuiah kalpui mek a nih thu leh Mizoram dinhmun tlangpui a tarlang a. Tehfung hrang hrang atanga zirchiannaah Health leh Education Sector-ah Mizoram chu nasa taka tan lak a ngaih thu a tarlang a ni. MPI report-in a tarlan dan chuan Mizoram-a cheng mi 100 zelah 9.8% hi rethei an tehna huam chhungah an awm mek thu a sawi bawk.
Chawhnu-ah Technical session hman a ni thung a, Session hi hlawm thumah then niin chipchiar zawkin SDG Index 4.0, North Eastern Region District SGD leh MPI te zirho a ni.