No.3760/2021-2022

Aizawl, the 22nd January 2022 : Vawiin khan SAD Conference Hall-ah ICT Minister Pu Robert Romawia Royte hovin ICT Deptt leh a kaihhnawih Department hotuten IT hmasawn nana ICT Deptt hmalaknate leh hmachhawp mekte an thlir ho.

He meeting kaihhruaitu ICT Minister Pu Robert Romawia Royte chuan ICT Deptt chu Department lian vaklo mah nise tunlai khawvelah chuan a pawimawh hle tih a sawi a. Dept-a thawktute tanlaknain hun hmasa lama ICT Deptt-in a tih ngai lem lohte pawh tihhlawhtlin a awm nual tawh tih sawiin kum 3 liam ta chhung khan Mizoram IT Infrastructure Policy 2021 nei hman a ni a, MeSEGS pawh Grant-in-Aid system-ah hlankai a ni bawk, a ti. Tunah hian ICT Deptt hian Sorkar Deptt leh Pvt organisation 338 zet website an host mek a ni tih a tarlang bawk. Mizorama la hman lar loh tak mai 'Smart Classroom System' pawh Govt HS 20 laiah PMJVK Scheme puihnain siam mek a ni a, NEC puihnain kum 3 chhungin sikul 150-ah Computer zirna din fel niin computer set 7 theuh leh khawl dangte dah vek a ni a ti.

Thu a sawi zelnaah ICT Minister chuan IT Development & Training Centre 12 dinna turin ICT Deptt-in Rs.11.88 crore hmanna tur DPR a siam a, Centre 7 atan Rs.6.93 crore sanction tawh niin Centre 5 dang atana sanction pawh hmuh belh beisei a nih thu a sawi a. Heng Centre te hi hlawhtling taka kalpui dan tur sawiho tura a Deptt kaihhnawihte kohkhawm an nih thu a sawi a ni.

Vawiin meeting-ah hian ICT hmasawnna tur kawng hrang hrangte chipchiar taka sawiho a nih hnuah hetiang hian thutlukna siam a ni : 1. IT Centre te hi College/HSS/HS behchhan zelin convergent mode-a kalpuiin NIELIT-in recognise se, zirna kalpuiin Certificate/Degree course zir theihin siam ni se.
2. Zawlnuam Govt College leh Chawngte Govt College-ah te chuan a area-ah Computer zirna a awm loh avangin BCA thleng zir theih turin ruahman chhoh ni se.
3. Govt HS/HSS-a Centre te pawh NIELIT Centre atan hman ni se, Sikul Zirlaite bakah a khuaa miten an zir duh pawhin Sikul Hotute leh NIELIT-in ruahmanna siam se.
4. Centre te hi ICT Deptt-in Agency-a a ruatten a sak leh khawl tul zawng zawng an dah fel hnuah H&TE leh School Education Deptt te kutah pek ni se.
5. A plan leh design te leh a hnathawktute thawh dan hi College/Sikul thuneituten enpuiin tha taka tih vek ni se.

Vawiin hian Govt Hnahthial College, Govt KVM HS leh Govt T.Romana College-ah te ICT-NIELIT IT Centre din dan tur an sawiho bawk.

He meeting-ah hian Pu TC.Pachhunga, Ex MLA & Vice Chairman, Sports, Youth Affairs, ICT & Tourism Development Board, Dr. Lalthlamuana, CIO, ICT & Officers, H&TE, School Education, Finance leh NIELIT aiawhte bakah V.C.P thlan bikte an tel a ni.