No.3761/2021-2022

Champhai, the 21st January, 2022: MJA Champhai District buatsaiha Mizoram Journalists’ Association (MJA) in kum 50 a tlin, Golden Jubilee (1972-2022) lawmna kalzelah vawiin chawhma dar 11:00 khan Golden Jubilee hriatrengna lungphun siam chu DIPRO Champhai Dr. Lallawmkima’n Press Club, Bethel Veng, Champhaiah a hawng a. MJA Champhai District Annual Conference vawi 34-na chu Khuallian niin a telpui bawk.

He hun Champhai District MJA President Pu Lalhmingmawia Pachuau kaihhruaiah hian DIPRO Champhai Dr.Lallawmkima chuan thu sawiin, mipuite zirtir kawngah leh an hnena chanchin thar rintlak tak puanchhuah kawnga thawk thintu pawl, ‘mipuite rawngbawlsak’ tih thupuia hmangtu Mizoram Journalists’ Association in kum 50 na hmel a hmu ta chu thinlung taka a lawmpui thu a sawi a. Tunlai thiamna sang zelah pawl member-te chu intuaithar zel tur leh, social media kaltlanga thu belhchian dawllo leh dik ziktluaklo thehdarha awm thinten harsatna nasa zawk a thlen loh nan leh a ven kawngah theihtawp chhuah thin turin a chah a. Mipuite rilru sukthlek leh ngaihtuahnate a tha lama hruai dik tura hrilhfiahtu leh zirtirtu nih tum zel turin a chah bawk a. Golden Jubilee lawmna chuan thlen china lungawina nilo hmasawn duhna a thlen ngei a beisei thu sawiin, an pawl kalzelna turah duhsakna a hlan a ni.

Vawiin MJA Champhai District Annual Conference vawi 34-naah hian pawl tana thil pawimawh hrang hrang leh hmalakna turte relin an pawl President Pu Lalhmingmawia Pachuau kaihhruaina hnuaiah rorel inkhawm neih a ni a. Chawhnu dar 3:00 ah kum 2022-2024 chhunga an pawl kaihruaitu tur thlanna DIPRO kaihhruaina hnuaiah neih a ni a. President-ah Pu Lalhmingmawia Pachuau, Pasaltha Editor chu thlan tlin a ni a, Pu Lalhlupuia, Lenrual Editor chu Vice President atan thlan niin, Pu Lalhmingliana, CCN News Editor chu Treasurer tura thlan a ni a. Heng bakah hian Executive Committee member tur mi 5 thlan chhuah an ni bawk.

Tun dinhmunah MJA Champhai District-ah hian member 15 an awm mek a, heng zinga 12 te hi Champhaiah awmin Khawzawlah 3 an awm bawk a, MJA Champhai District huamchhungah hian nitin chanchinbu chhuak 5 leh Local Cable TV 2  an awm mek a ni.