No.3762/2021-2022
Aizawl the 21st January, 2021 : Science Teacher's Association, Mizoram (STAM) leh Samagra Shiksha, Mizoram buatsaih 'State Level Children's Science Congress' vawi 29-na, January ni 20 & 21, 2022 chhungin Conference Hall, Directorate of School Education, Treasury Square, Aizawl ah neih a ni a, School Education Minister Pu Lalchhandama Ralte chuan khuallian niin a hmanpui. He State Level Children Science Congress-ah hian 'Science for Sustainable Living' tih thupui hmangin Child Scientist ten an thil zirbing project pholangin intihsiakna hi an nei a ni.
School Education Minister Pu Lalchhandama Ralte chuanhe hunah hian thusawiin Child Scientist-ten project țha tak tak an phochhuak thei chu lawmawm a tih thu leh hmasawnna hnathawh hrang hrang hi research tel lova thawh a tam a, hei hian a nih tur ang a nih tir lo fo thin a ti. Child scientist-te chu ram leh hnam mamawh research țha nei zel turin a fuih a, hna an thawh hnuah pawh ram leh hnam mamawh chhanna ni turin a chah a, Science lama thil an zir leh hmuhte auchhuahpui fo turin a fuih bawk. Lunglei ațanga project rawn present-tu Esther R.Vanlalhriathlui chu amah puitu pawh a nau a nih bakah a guide pawh a nu Laldikzuali Pachuau a ni leh zel te, nufaa project an rawn phochhuak theite chu ropui a tih thu a sawi bawk.
Pu Lalhmachhuana, SPD Samagra Shiksha pawhin thusawiin quality education atana pawimawh tak Children Science Congress neih a ni chu lawmawm a tih thu a sawi a, quality education-ah chuan mahni thlen chin ațang theuha mahni kea ding thei nih hi a pawimawh a ni a ti. India hi Human Development Index leh Human Capital index ah 115-na a ni mek a, mihring piang chhuakin a kum milin a nih tur ang a ni em tih tehna a ni a ti a. Zir san ringawt ni lo, mi an thlen chin țheuha an nih tur ang nih a, an thiam tur ang thiam zel hi a pawimawh thu a sawi bawk.
December ni 13-17, 2021 chhung khan Mizoram District tinah District Level Children's Science Congress neih a ni tawh a, State Level-ah hian District hrang hrang atanga project 26 lo lut atangin intihsiakna hi neih a ni.
State Level-a tițhate hi National Level Children's Science Congress leh Indian Science Congress-a tel tura thlan an ni. National Level Children's Science Congress hi February ni 1-5, 2022 chhungin On-line/Virtual in neih tur a ni a, Mizoram aiawha tel tur project tha 10 thlanchhuah National Level Children's Science Congress Vawi 29-na a tel tur te chu :
1. Saizampuii Sailo, St. Pauls HSS, Aizawl
2. Christina Lalruatfeli, Govt. Kolasib High School. Kolasib.
3. Diana J. Thatiphangiarili, Donbosco School, Siaha.
4. Lallawmpuii, Z. Rosanga School. Leite. Hnahthial District.
5. Vanlalawmpuia Khiangte, Govt. Saitual High School. Saitual District.
6. C. Vanlalruattluangi, SS Memorial School, Aizawl.
7. Esther R. Vanlalruathlui, Sacred Heart School, Lunglei.
8. Sairengpuii Sailo, Rosebud School. Aizawl.
Indian Science Congress-a tel tur te:
1. K. Darthangmawia, Kids Care School. Aizawl.
2. Ida Malsawmtluangi, PES, Khawzawl.
Kumin State Level Children Science Congress-ah Lawngtlai District tih loh District dang zawng ațangin an tel thei vek a. Kum hmasa pawh khan hrileng karah state level hi hlawhtling takin buatsaih a lo ni tawh a ni.
Attachment
- Loading attachment...
