Nimin khan Chief Minister Pu Lal Thanhawla chuan cheng nuai za (Rs. 100 lakhs) senga sak ‘ST Womens Hostel’ leh cheng nuai za leh sawmhnih (Rs. 120 lakhs) senga sak Library cum Seminar Hall te Mizoram Polytechnic Lunglei campus ah a hawng. 

Chief Minister chuan zirlaite mamawh hmasawnna ruhrel changtlung tak ST Womens Hostel leh Library cum Seminar Hall Mizoram Polytechnic Lunglei in a nei thar chu a lawmpui thu sawiin zirlaiten tangkai taka an hman theihna turin duhsakna a hlan a. Mizoramin zirna lamah hma a sawn zel theihna tur leh thalaite tan khawvel thar buatsaih turin sawrkarin chak takin hma a la mek zel a, Education Reforms Commission din a nih tawh bakah Skill Development leh eizawnna kawng inkawhhmuhna hun MYC Youth Summit & Road Show 2018 District capital hrang hrangah hlawhtling taka hman a nih thu a tarlang. Tum mumal tak neih a pawimawh thu sawiin Chief Minister chuan zirlaite chu hmathlir thui tak nei chunga an zirlai an zawhfel hnua an hnathawh tur leh an eizawnna tur ngun taka ngaihtuah lawk turin a chah a. Zirtirtu kalkhawmte hnenah pawh fuihna thu sawiin zirlaite tana entawntlak a awm turin leh, ambition mumal tak nei tura an zirlaite fuih a kaihruai thin turin a chah a ni. 

Chief Minister chuan India leh thenawm ram inkara insumdawntawnna tihmasawn turin Kaladan Multi Modal Project pawh chak taka kalpui a nih thu sawiin, hei hian thui takin Mizoram economy tan malsawmna a thlen theih thu leh, chu hmasawnna haichhuak thei tur chuan Mizo thalai te ngei thawk se duhthu sam a nih thu sawiin, chutiang taka thawkthei tur chuan vawiin a zirlaite chuan theihna chhawrtlak nei tura capacity building lama hmasawn Mizoramin mamawh a tih thu a sawi a ni. Ram hmasawnna chak taka kalpui tur chuan mahni kut ke ngeia eizawnna kawng dap thiam entrepreneurs thahnem tak kan neih a tul a ni tiin thalai tam zawk ten mahni kutkawiha eizawnna kawng an zawh theih nan NEDP hnuaiah Entrepreneurship Development Scheme (EDS) ruahmanna siam a nih thu sawiin hemi hnuaia sawrkarin intihsiakna leh scheme a ruamhan te ngaihven ve turin zirlaite chu a sawm a ni. 

Mizoram Youth Commission Chiarman Pu Joseph Lalhimpuia pawhin he hunah hian thu sawiin Mizoram chhimlam zirlaiten NEET leh IIT-JEE exam atana tha taka an inpuahchah theih nan MYC chuan India rama Coaching Centre hlun berte zinga mi ALS Delhi kaltlangin Online Coaching Centre a hawng tawh a, UPSC leh SSC Coaching te pawh kalpui zel a ni dawn, a ti. Skill Development lama thalaite hmasawnna tur thil tul chi hrang hrang inhrilh hriatna hun leh lehkha zirna leh eizawnna tura kawng inkawhhmuhna hun MYC-in a buatsaih Youth Summit and Road Show Lungleia neih mek chu chhim ve ngei turin zirlaite a sawm a. Mizo thalai tam zawk ten Commonwealth ram hrang hrangah eizawnna an hmuh theihna turin IELTS Coaching pawh kalpui mek a nih thu a tarlang bawk. MYC Chairman chuan zirlaite chu nakin lawka ram hruaitu tur an nih avangin ram leh hnam tana chhawrtlak thiamna nei tura inpuahchah turin a fuih a ni.

ST Womens Hostel leh Library cum Seminar Hall hawnna programme ah hian Er B. Lalhmuakluaia, Principal, MPL leh Er C. Thanseia, Founder Principal MPL ten thu sawiin Dr. R Prasad, Sr Grade Lecturer MPL-in lawmthu sawiin hun a khar a ni. Khuallian Chief Minister hi Pi Lal Riliani, President, Indian Society on Tobacco & Health: Mizoram Chapter chuan a tawiawm a ni.

ST Womens Hostel hi sawrkar laipui Ministry of Human Resource Development (MHRD) atanga fund hmuh cheng nuai za (Rs. 100 lakhs) senga sak a ni a. Khum 50 awm theihna niin a zau zawng plinth area hi 270 square meters a ni. Fencing hi Mizoram sawrkar hnen atanga fund hmuh hmanga sak a ni.

Library cum Seminar Hall changtlung tak hi All India Council for Technical Education  North Eastern Quality Improvement Program (AICTE - NEQIP) atanga fund hmuh cheng nuai za leh sawmhnih (Rs. 120 lakhs) senga sak a ni a. He Library cum Seminar Hall hna hi June 2014 atanga thawh tan niin June 2017 ah thawh zawh a ni. A zau zawng plinth area hi 250 square meters a ni.