Vawiin chawhnu khan Champhai Officers’ Club (COC) leh Sub-Hqtrs YMA, Champhaite chuan  kumin April Ni 16 a Myanmar ram chhung, India ramri depa awm Khawmawi khuaa kangmei chhuak avanga chhiat tawkte tanpuina tura member-te atanga vehbur tlingkhawm hlanna an nei.

Hemi pual hian inkhawm tawi buatsaih niin Pu PC Lalrawnliana Secretary, Sub-Hqtrs YMA Champhaiin a kaihruai a. Pu Lalnunmawia, Ex-Principal, Govt. Champhai College, President, Champhai Officers' Club leh Pu VL Chama Hnamte President, Sub-Hqtrs YMA Champhai ten thu an sawi bawk a. Pu Lalhnehliana, President, Rih Lentlang Youth Association (RLYA), Tiau Branch-in chhiat tawh dan leh chhawmdawl hna thawh dan tlangpui report a pe a ni

He hunah hian Champhai Officers Club (COC) hruaitute, Sub Hqtrs YMA, Vanhnuailiana Group YMA leh Zokhawthar Branch YMA hruaitute an tel bakah  Rih Lentlang Youth Associations, Tio Youth Association, Khawmawi VC leh khawtlang hruaitu dangte pawhin an telpui a. Mizorama Zohnahthlak unauten pa chan changa an tawiawmna leh thlamuanna avangin lawmthu an sawi a. In kang senghawi leh tanpui ngaihna apianga chet an thawhna chu fakawm an tiin inunauna tizualtu ni ngei thei se an duh thu an sawi bawk a ni. Thilpek petu lam atangin tanpuina tlingkhawm chu beitham mahse thinlung taka pek anih thu leh, lawmna leh lungngaihnate chu intawmpui tlat a tul thu an sawi a. Ramin ri a nei a, hnam erawhin a neih loh thu leh hnam hmelma apiangte do tlang zel a tul thu tarlan a ni bawk.

Vawiina COC bultuma tanpuina sum tlingkhawm hlan tak hi Rs 150000/- a ni a, Champhai Officers’ Club aiawhin Vice-President Pu RL Thianghlima, Principal, DIET Champhaiin a hlan a. Sub-Hqtrs. YMA hnen atangin Rs 313610/- leh Vanhnuailiana Group YMA atangin Rs 51900/- te RLYA Tiau Branch kutah hian Pu VL Chama Hnamte-in a hlan  bawk a. Vawiina tanpuina sum hlan tak hi avaiin Rs 515510/- a ni.

Kumin April Ni 16 chawhnu dar 2:30 vel khan vanduaithlak takin Khawmawi khuaah hian kangmei a chhuak a, In 9 vel a kangral a ni.