4872/2024-2025

Dated Aizawl, the 28th March 2025: Vawiin khan Land Resources, Soil & Water Conservation department ten ATI Auditorium, MINECO ah Kuhva chingtute tan Training cum Seminar on Scientific Method of Cultivation of Arecanut & Pest Management an buatsaih a. A hawnna inkhawm hi Chief Minister Pu Lalduhoma chuan a telpui a, Pu Lalthansanga, Minister, LRS & WC chu khualzahawm a ni.

Chief Minister chuan, Myanmar lam atanga dan lo va Kuhva lakluh a nih thin avangin kan rama Kuva chingtuten in hralh tha hlei thei lo va. Sawrkarna kan rawn lak ve leh in harsatnate tihtawp tumin hma kan la nghal chat a ni. Kan Home Minister pawh a tang hle a, man pawh kan man nasa. Vawiinah chuan a tawlhruk chingte pawh an tawmim tawh hlein ka hria. Zaa za han tihrem nghal barh chu a la harsa deuh va, kan la bei zel dawn a ni.

In harsatna chin felna leh hlawk zawka Kuhva in hralh theih nan a process-na lam hi i din ve ang u, kan ti a. NEC ah Rs. 7.43 crore kan thehlut a, min rawn sanction tawh a. Chemphaiah leh Zamuangah Kuhva Processing unit din kan tum, khawl hmangin kan tiro ang a, a khehna kawrin leitha kan siam ang a, a rah hmin thate a Skop ah kan siam ang a, a hawngte chu plate-ah siam kan tum bawk.

Tlangram vata lo neih kan la uar hle a, a hlawk si lo va, ram a tichhe nasa bawk si a. Huan nghet neia hmalak hi a tul hle. Chutianga tana tha chu Kuhva hi a ni. Kan sik leh sa a inthlak zel avangin Mamit leh Kolasib ah chauh ni lovin district dangah pawh a chin chhoh theih tan a ni. Ministry of Agriculture & Farmers Welfare leh Ministry of DoNER lamin Kuva chin belh zawnga hmalak rawn remti chiah tawh lo mah se, kan sawrkar hi chuan a duh apiangte chintir zel kan la tum a. Tunah hian Handholding tanpuina diltu mi 318 leh CM Special Package diltu mi 93 an awm mek a ni.

Nikum chhung khan Mamit district-a Kuhva tam enkawlna tur damdawi hi sawrkarin Rs. 33 lakh man kan pe chhuak a. In la indaih lo hle tih kan hria a, a tul angin kan la ngaihtuah zel turah te ngai ang. Tin, mithiam in mamawh tih pawh kan hria a ni. Damdawi kan pek che u te kha dik taka in hman thiam theih nan vawiinah training in han nei dawn a, thahnemngai takin, hlawkpui ngei tumin in lo zirho dawn nia, tiin duhsakna a hlan.

Chief Minister hian Kuhva chingtu mi pathum hnenah lawmman a hlan a, a dawngtute chu: Mizorama kuhva chin bultantu Pu Lalbiakseia, Bilkhawthlir, kum 1965 atanga ching tantu, Mizorama Kuhva kung ngah ber Pu Saikhalha, Zamuang, Kuhva kung singthum chuang neitu leh Kuhva enkawl dan tawnhriat tha tak tak neia midangte tanpuitu Pu Zamzela, Tuikhuahtlang te an ni.

Pu Lalthansanga, Minister, LRS & WC pawhin thusawiin, tun hma zawng aia huapzo leh rin tlak zawkin kan sawrkar hian loneitute kan enkawl dawn che u a. A dawngtu tur te hnenah dik takin hnathawhna tur sum hi kim takin kan pe zel dawn. Hand Holding pawh hi tanpuina a ni lo va, hnathawhna tur sum zawk a ni. Hna thawk duh lo tan kha chuan beisei chi pawh niin a lang lo. Ka pawm danah chuan nangni huan neitute zawng zawng hi Soil Department-a thawktute in ni vek a. Kan zavaiin in hmasawnna tur kan dapho ang a, kan thawkho zel dawn a ni, a ti.

A hawnna inkhawm kaihruaitu Er. Vanlalmuanpuia Chhangte, Director, LRS & WC chuan Training an buatsaih chhan chu kum 2021 chho atanga Kuva a rawn tam ve tak vang a ni a. Kuhva tam hi kan zirchiang tawh a, a natna leh a damdawi tur hi kan hmuchhuak tawh a, nikum khan Mamit district lamah chuan a damdawi hi Rs. 33 lakh man kan pe chhuak tawh nghe nghe a ni. Amaherawh chu, huan neitu thenkhatten in lo hmang thiam tawk lo tih te kan hria a. Chuvang chuan he training hi kan buatsaih a ni, a ti.

Pu Lalsangliana, Secretary, LRS & WC chuan Kuhva huan neitute tana department in ruahmanna a siam te, Kuhva Processing unit hmun hnih a din an tum thu te. A rah mai ni lo, a kawr pawh dispisable plate-a siam an tum dan te a sawi a. Kuhva bakah Chief Minister's Rubber Missions leh Hmunphiah chingtute tana hma an lak dan te pawh a sawi bawk. 

Mizoram Kuhva Chingtu Pawl President Pu C. Laldina pawhin thusawiin, dan lo va Kuva lakluhin kan kuhva hralhna lamah harsatna nasa tak min siamsak avangin kan pawl hi kan din a. Kan dilna leh kan thil mamawh tinrengah sawrkarin min ngaihsak em em a, kan lawm hle a ni, a ti.

Chawhnu lamah training an nei zui ang a, Dr. Rebecca Lalmuanpuii, Subject Matter Specialist (Agroforestry) leh Dr. Vanlalhruaia, Subject Matter Specialist (Plant Protection), KVK Mamit District, Lengpui ten zirtirna an pe dawn a ni.