139/2022-2023
Aizawl the 12th April, 2022: Chief Minister Pu Zoramthanga chuan vawiin khan Mizoram Rahbi: Micro Startup Capital Competition 4.0 a tithate hnenah lawmman a hlan. Planning & Programme Implementation Department hnuai a Entrepreneurship Development Centre-in Mizoram State Entrepreneurship Development Monitoring Committee (MEDMOC) hmalakna bawhzui a Mizoram Rahbi: Micro Startup Capital Competition 4.0 a buatsaih hmawrbawkna hi Dawrpui Multipurpose Hall a neih a ni.

Chief Minister chuan Mizoram Rahbi intihsiakna thil tum chu tha a tih thu sawiin, thil tangkai tak tak leh tha tak tak ngaihtuah chhuah hi a bul tanna lian lo te a nih fo thin thu leh, thil te reuhte a kan ngaihte hi hlawhtlinna tlanga mi hruaitu a nih thin thu a sawi. Vawiina lawmman dawngtute chu a lawmpui thu sawiin, lian zawka insiam zel tum turin a chah a. Thil siamchhuah tha tak tak te, thenkhat state pawn atanga chawk luh ngei ngei thin mahni ramchhung ngeia siamchhuah tak te hmuh tur a awm chu lawmawm a ti a. Mizoramah hian chutiang zawnga ngaihven a la hmuhchhuah leh hriatchhuah tur tam tak kan neih thu a sawi a. A theihna chen chenah entrepreneur ten state chhung ami ngei raw material hman ni se a duh thu a sawi. Chief Minister chuan entrepreneurship a tuina a awm zel chu lawmawm tiin, sawrkar pawhin economy chawisan a tumna leh a hmalak mek naah a ngaihpawimawh thu a sawi a ni.

Chief Secretary Dr. Renu Sharma, MEDMOC Chairperson ni bawk chuan thu sawiin, Mizoram Rahbi intihsiakna tum li naah a tui mi tak tak, kum upa lam leh naupang lam tel hmuh tur an awm leh, lawmman dawng tura thlan mi 13 zinga hmeichhia 3 an awm chu lawmawm a ti a. Heng lawmman dawngtute hi sawrkar chuan thlahthlam lovin a en thlithlai zui zel tur thu a sawi a. Lawmman dawng ve thei ta lo te pawh an that loh bik vang a dawng ve lo a ni lo tih hriaa, beidawng lova tang zual sauh turin a chah bawk.

Competition a tel zawng zawng te hi ni hnih chhung entrepreneurship training pek an nih bakah finalist te chu ni hnih chhung bootcamp neihpui an ni bawk a. He intihsiakna ah hian mi 71 inel te zingah a ti tha mi 13 thlanchhuah niin, an project a zirin cheng nuaih sarih leh sing nga thleng an sumdawnna bultanna (Startup) atan pek an ni.

Vawiin programme ah hian MEDMOC Expert Member Dr. Laldinliana hnen atangin thusawi tawi ngaihthlak a ni bawk a. Entrepreneur te atangin HLDL Solution Pvt. Ltd. Director in an bultan dan leh hmasawn dan thu a sawi a. Pu Lalmalsawma Pachuau, Planning & Programme Implementation Department Secretary leh MEDMOC Alternate Chairman ni bawk chuan lawmthu sawiin hun a khar a ni.

Mizoram Rahbi: Micro Startup Capital Competition 4.0 a lawmman dawngtute chu hengte hi an ni:
1) C. Lamuanpuia - Aloeswood Mizoram
2) C. Lalropuia - BT Enterprises Pvt. Ltd.
3) C. Vansangmawia - KUKA
4) HP Lalremsanga & Zokhawmuana - City Coffin Suppliers
5) J Lalramthara - Deon Enterprise
6) Jacob VL Awmpuia - Kobbie Woods Industry
7) Jonathan Thangeo & Lalhruaizela Ralte - Mizovation
8) Joshua Zoramliana Hnamte - J&J Enterprise
9) K. Lalrinsangi - Hebron Nutrifeeds
10) Lallawmkima Ralte - Bi-sons Pvt. Ltd.
11) Lalrinpuii Hmar - Blue Montis
12) Lalthlamuani - ECO FAR
13) Peter Lalngaihawma - Allevia Care