138/2022-2023

Champhai, the 12th April, 2022: Law & Judicial Minister Pu T.J. Lalnuntluanga chuan vawiin chawhnu khan a bial Champhai South chhunga hmasawnna ruhrel hnathawh mek leh hmachhawp hrang hrang; Tlangsam Ecotourism Park, Cultural Centre dinna tur leh Volleyball Court siam te, Champhai Ring Road project hnuaia Zotlang atanga Tlangsam paltlanga Zote panna kawng siam leh Chhungte Futsal Ground siamte tlawhin a enfiah.

Pu T.J. Lalnuntluanga chuan kum 2019 atangin Cultural Centre din nan Sawrkar laipui Ministry of Culture hnuaia Tagore Cultural Complexes Scheme kaltlangin Tlangsam hmun hlui chu cheibawl tuma ruahmanna siam tan a nih thu leh Sawrkar laipuiah DPR te thehluh fel daih tawh a nih thu a sawi a. National Appraisal Committee pawmpui tura chhawpchhuah mai tawh tur a ni a, bultan nan cheng nuai 1,500 a hmin mai beisei a ni, a ti a. Tlangsam Eco Tourism Park siam nan JAICA hnuaiah cheng nuai 300 beisei a nih thu a sawi bawk a. Khaw neituten phur taka project siamte an tuipui leh hmalakna an thlawp thin chu hmuh nuam a tih thu leh hmalak lehzelnaah phurna leh chona a pek thin thu sawiin, project a hlawhtlin theih hunah Tlangsam Ecotourism Park-ah Champhai District Chapchar Kut lawmna pui ber hman a nih ngei a beisei thu a sawi bawk.

Inkalpawhna siam kawnga hmalaknate tarlangin, Ring Road project hnuaia Tlangsam hmun hlui tlang atanga Zote Falkawn pawh tura kawng laihpawh lo tinzawn tawh chu tuihna humhalh duhna avangin khaw chuanhnuai zawka kaltir tura ruahmanna neih a ni, a ti a. Hrilengin ziaawm lam panin sumpai dinhmunin awmzia a nei deuh deuh anga, hmasawnna ruhrelte pawh a tul angin siam zel tum a ni, a ti bawk.

Law & Judicial Minister hian vawiin tlai khan Chhungte khua a tlawh a, Futsal Ground siam endikin khawtlang mamawh leh hmachhawpte a sawipui a ni.

Pu T.J. Lalnuntluanga hi Dr. Lallawmkima DIPRO leh khawtlang hruaituten an tawiawm a ni.