No.6754/2020-2021 
Aizawl the 3rd December, 2020: Chief Minister Pu Zoramthanga chuan vawiin khan ni hnih awh tur Mizoram Science Congress 2020 chu CM Office atangin a hawng. He science inkhawmpui hi COVID-19 hrileng avangin tun tumah hian Online a buatsaih a ni.

Chief Minister chuan Science Congress chhimtu zawng zawng chu hun hlawkthlak tak an hman a duhsak thu leh, anmahni leh ram tana hlawkpui tham thiamna he inkhawmpui atang hian an chharchhuah ngei a beisei thu a sawi a. Science avanga khawvel changkanna in hma a sawn chakzia sawiin, mihring ngaihtuahna atangin science lama tuimi, thil chik mite avanga tunlaia kawng tinrenga hmasawnna hrang hrang kan hmuhte hi a lo awm ta a ni a ti. Chief Minister chuan tunlai kan hrileng, khawvelin kan buaipui em em COVID-19 chungchang sawihona an nei tur chu lawmawm a tih thu sawi bawkin he hri hi a lo reh a, damdawi siam tur chuan science lama mithiamte bawk khawvel innghahna a nih thu a sawi.

Science Congress hawnna inkhawm kaihruaitu Dr. Vanlalramsanga, Commissioner & Secretary, Planning (Science & Technology Department) chuan Science chu mihring nun nawmna leh nunkhawchhuahna laimu a nih thu a sawi a. Hrileng avanga online a programme buatsaih a nih tak thu leh, Mizoram chhung leh ram pawn ami tam thei ang bera an chhhim theih nan local cable channel pahnih a live a pekchhuah a nih bakah Youtube a live a nih thu a sawi.

MISTIC Chief Scientific Officer Dr. R.K. Lallianthanga chuan he ni hnih chhung hian mithiam hrang hrang atanga science zar hrang hranga thusawi leh sawihona pawimawh tak tak ngaihthlak tur a awm thu te a sawi a. Science hmasawnna in khawtlang nun leh ei leh bar, economy hmasawnna a thlen zia sawiin, he Science Congress hi mipui ten an lo hlut zual zel a duh thu a sawi a ni.

Vawiin science congress hawnna inkhawm neih zawh hian Physical Science, Engineering leh IT lamah presentation neih niin hetah hian Prof. R.H. Duncan Lyngdoh, Department of Chemistry, NEHU chu Keynote Speaker niin Mizoram University leh NIT-Mizoram atanga mithiamte expert member an ni a. Intellectual Property Right chungchanga sawihona in a chhunzawm a. Zan dar 8 atangin COVID-19 hrileng chungchangah special live session neih a ni dawn a ni.

Naktuk December ni 4, 2020 hian Climate Change, khawvel sik leh sa inthlak danglam chungchang sawihona neih a ni ang a; chumi hnu ah Agri & Allied, Life Sciences & Bio-Medical Sciences, Earth Sciences chungchang presentation neih leh niin, hetah hian Prof. F. Lalnunmawia, Hoticulture Development Board Vice-Chairman chu Keynote Speaker a ni ang a. Naupang pualin Children Science Expo neih ni bawkin hetah hian child scientist thlanchhuah ten presentation an pe bawk ang.

Mizoram Science Congress Mizoram Science, Technology & Innovation Council (MISTIC) leh Mizoram Science Society (MSS), Science Teachers' Association Mizoram (STAM), Mizo Academy of Science (MAS), Biodiversity & Nature Conservation Network (BIOCONE), Mizoram Mathematics Society (MMS) leh Geology Society of Mizoram (GSM) tawngkawp a buatsaih a ni a. Kum 2016 atang khan kum khat danah buatsaih ziah thin niin, science zirlai leh zir bing mite, thil siamchhuaktute leh science lama tui hrim hrim ten an thil zir leh hriatte inhrilh tawn a, science lama hriatna tipung tura hun hman thin a ni a.