No.6753/2020-2021

Kolasib 3rd December 2020: Vawiin chhun khan Land Resources, Soil & Water Conservation Department, Kolasib district hnuaiah Thelret chingtute hman turin Thelret sawngbawlna khawl (Rubber Rolling Machine) sem chhuahna hun hman a ni a. He hun hi Pu V.Vanlawma, District Officer, LR,S&WC in kaihruaiin Dr. H. Lalthlangliana, Deputy Commissioner chu khuallian a ni.

Khuallian Dr H.Lalthlangliana chuan Rubber hi leilung luang ral tur venna thlai tangkai tak anih thu sawiin khawvel hmun hrang hrangah tangkai tak a hman anih thu a sawi a. Khawvelah Rubber hman tangkaina a pun zel thu leh a hlutna pawh a san zel thu a sawi.Bawrhsap chuan Kolasib District chu thelrel chin nana hmun tha anih angin a bik takin Rubber chingtute tan dinchhuah nan hmanraw tangkai anih theih thu a sawi a, rubber chingtute chu an huan enkawlna kawngah taihmakna leh teirei peihna nei turin a fuih bawk a ni. Kolasib DC chuan thelret sawngbawlna khawl dawngtute chu enzawnna tlak leh intodelh nan an khawl dawnte chu hmang turin a chah bawk a ni.

Land Resources, Soil & Water Conservation Department hnuaiah hian Mizoram district hrang hrangah Rubber Rolling Machine 100 semchhuah mek a ni a, Kolasib district chhunga thelret chingtu mi 24 te hnenah vawiin hian hlan an ni a. Rubber Rolling Machine bakah hian Rubber hnaina atana hmanraw pawimawh hrang hrang te pawh semchhuah nghal a ni bawk. Rubber Rolling Machine Flag Off Programme hi ni 2 December, 2020 khan Directorate of Land Resources, Soil & Water Conservation Dept. Aizawlah Minister Pu R. Lalzirliana hovin neih tawh niin vawiin a?angin District hrang hrangah Flag Off Programme hi neih chhunzawm ve leh a ni. Kolasib District chhungah LR,S&WC Department chhinchhiah dan chuan Rubber kung nuaih 2.25 bawr vel a awm mek a, heng zingah hian hnai mai theih kung 50000 vel a awm mek bawk a ni. Rubber chingtu chhungkua 216 vel awmin ching thar tur a rauhmanna kalpui pawh an awm nual bawk a ni.