Chief Minister Pu Lal Thanhawla’n vawiin khan a vawikhatna atana Mizorama science lama mithiamte leh zirlai naupangte intawhkhawmna Mizoram Science Congress 2016, Mizoram University Auditorium-a buatsaih chu khuallian niin a hawng a, Science Congress hawnna inkhawm hi Finance Minister, Science & Technology Department changtu ni bawk pawhin khualzahawm niin a hmanpui a ni. MZU Vice Chancellor, Prof. R. Lalthantluanga pawh inaugural function ah hian a tel a ni.

Chief Minister Pu Lal Thanhawla chuan kawng tin rengah Science leh Technology in khawvel nunphung a her danglam nasat thusawiin Mizoram anga ram thang mekah chuan Fundamental Research leh Applied Science hi kaikawpa, tunlai thiamna chhawr tangkaia, a taka hman thei ang chi practical thil ngaihtuah chhuah leh siamchhuah hi mithiam ten an ngaihpawimawh a tul a ni, a ti a. Tunlai khawvel danglam chho zelah hian digital thiamna in nasa takin min tuam mek a, hengte hian mipui rawngbawlna kawngah leh nitin khawsak zia ah te awlsawmna tam tak min siamsak a, heng thiamna te hi mipui mimirin tam zawk a a taka an tangkaipui turin pratical zawnga thil kan kalpui a pawimawhin ka hria a ni, a ti a. Science leh Technlogy lama kan thiamna zawng zawng hi ram mipuite chhawr theiha hman a ni em tih ngaihtuah chunga mithiamten a taka hman theih tur practical ang chi zawnga an zirbingna an kalpui theih chuan nasa zawkin ram in hma a sawn a beisei thu a sawi bawk.

Mizorama mipui tam zawk eizawnna chu ram behchhan anih thu sawiin Chief Minister chuan agriculture lamah abik takin tunlai thiamna hman a tulin a pawimawh a, tunlai sik leh sa inthlakdanglam tuar thei thlai ‘climate resilient crops’ te kan buatsaih a hun tawh a, Mizoram hi lirnghing thlen theihna ram Seismic Zone 5 a awm kan nih angin chhiatrutpna thleng thei lakah tunlai thiamna hmanga inven theihna dan tur ang te lamah zirbingna neih a pawimawhin ka hria a ni, a ti a. Nizung hmanga power siamchhuahna kawngah pawh tan lakna tur tam tak a awm nia a hriat thute a sawi bawk a ni.

Tunlai thiamna hmanga hmasawnna thleng reng reng chu kan chhehvel boruak leh khawvel te vawnghima, a tichhe lo zawnga, inbuk taka kalpui a pawimawh thusawiin sustainable development hi hi kan tunlai khawvel mamawh ber thil a ni a, naktuka kan tu leh fate mamawh tur ngaihtuah chunga vawiina kan mamawhte kan phuhruk hi a kawk berin ka hria a ni tiin, Science Congress hi duhsakna a hlan a. Chief Minister hian he programme behchhana Exhibition buatsaih chu a tlawhkual bawk a ni.

Vawiina inaugural function hi Dr. R.K. Lallianthanga, Chief Scientific Officer leh Chairman, MSC2106 Organizing Committee ni bawk chuan kaihruaiin Dr. Lalfakzuala, Secretary, MSC 2016 Organizing Committee chuan Mizoram Science Congress thil tum te leh a huang chin te sawiin hun a hmang a ni.

Mizoram Science Congress 2016 hi Mizoram Science, Technology & Innovation Council (MISTIC); Mizoram Academy of Sciences(MAS); Mizoram Science Society (MSS); Mizoram Mathematics Society (MSS), Geological Society of Mizoram (GSM) leh Bio-diversity & Nature Conservation Network (BIOCONE) tangkawpte buatsaih a ni a. He Congress hi North Eastern Council (NEC); Sawrkar Laipuia Department of Science & Technology (SERB) leh MISTIC te tangkawpin an sponsored a ni. Thupui ah “Science & Technology for Shaping the Future of Mizoram” tih chu hman a ni.

Ni hnih awh tur Mizoram Science Congress 2016 ah hian mithiam 70 chuangin technical paper te an present dawn a, child scientist 27 ten zirbingna an neih te an tarlang anga, Deapartment leh zirna in atangte in exhibit 50 chuang pholan a ni bawk.