Cheng nuai 350 senga buatsaih tur Digital Planetarium sakna tur Lunglei Zohnuai high school ram chu vawiin khan Pu Joseph Lalhimpuia Parliamentary Secretary chuan a hmunah a tlawh. Pu Joseph Lalhimpuia chuan he Digital Planetarium, NEC kaltlanga sak tur hi Mizorama awm hmasa ber tur a nih thu sawiin Science & Technology Department in DPR siamin an thehluh tawh thu a sawia, Zohnuai khawtlang hruaitute leh Zirtirtute inpekna leh thahnemngaihna avang a hetianga thil hi helai hmuna ruahman theih a nih thu a sawi bawk a ni. Zirna chungchang sawiin Pu Joseph Lalhimpuia chuan Primary atanga High School thlengin Headmaster recruitment rule siam that mek a ni a, za zela 50 chu seniority a lak tur niin za zela 50 chu Departmental Exam hmangin a thiam leh hmantlakte lak an ni dawn a ni a ti a, hei hian zirna kawngah zirlaite leh zirtirtu te hmasawnna a thlen ngei a beisei thu a sawi a ni.

Pu Lalramchhuana Scientific officer, Science & Technology Dept. in report a a tarlan danin Digital Planetarium hmun tur hi Zohnuai High School leh Zohnuai Primary School II ten an pek a ni a, Digital planetarium sak nan hian hmun zau tawk tak sq. feet 12000 dawn lai mamawh a ni a, Pu Joseph lalhimpuia Parliamentary secretary hmalaknain Science & Technology hotuten Lunglei hmun hrang hrangah a sakna tur an dap hnuin helai hmun hi rem chang berah ngaiin an thlang ta a ni. NEC atanga sum pekchhuah a nih veleh hma la nghal thei turin Directorate of Science & Technology pawh an inpeih reng tawh tih a sawi a, he Digital Planetarium hi Arsi pian (shape) anga sak tur a ni a, tum khatah mi 60 in an en theih tura ruahman a ni a ti. Mizoram sawrkar hmathlir ah chuan helai hmunah hian Planetarium mai ni lovin Dist. science Centre din a, changtlung taka insawh nghet chho zel turin leh helai hmun hi zirlaite mipui mimir tan Science lama hmasawnna leh inzirtirna hmun pawimawh tak a nih an beisei thu report ah hian tarlan a ni bawk.