Ni hnih chhung awh tur Southern Range Quarterly Review Meeting chu vawiin khan SP Conference Hall Lungleiah neih tan a ni. He hun hi Pu Joseph Lalchhuana IPS, DIG (SR) chuan a hawng a, hawnna thu sawiin Southern Range hnuai a District pathum Lunglei, Lawngtlai leh Saiha chhunga venhimna leh dan leh thupek kengkawhtu Police te chu an thawk tha hle a ti a, hetihlai hian Lunglei a Court leh Magistrate Quarter a pawikhawihna thleng leh Saiha Police Station suasam a ni te chu vanduai thlak a tih thu sawiin tun ai a chak zawk leh khauh zawk a hmalak a tul thu a sawi a, dan leh thupek ken kawh chung changah Police te pawh nasa zawka intuai tharna leh inzirtirna neih a tul thu a sawi bawk a ni.

Vawiina Quarterly review meeting ah hian Southern Range hnuaia kum 2015 leh 2016 chhunga pawikhawihna leh thubuai ziahluh te zir chiangin khaikhin a ni a, nikum 2015 January thla atanga September thla chhung khan Southern Range hnuaiah hian thubuai 256 ziah luh a ni a, Kumin January thla atanga September thla chhung khan thubuai 418 ziah luh a ni thung a, nikum aia kumina thubuai ziahluh tamna chu za zela 63 zet a ni. Rukruk, tharum thawhna leh inchhungkhur tihbuaina bakah invauna ang chiah nasa takin thubuai a pung tih tarlan a ni a, Chutih lai chuan thubuai lian tham pawngsual, tualthah leh hmeichhe zahawmna tihbawrhban lamah chuan tlemin Case a tlahniam zawk tih an sawi a ni. Thubuai 418 ziahluh ah thubuai 315 ah Charge sheet submit tawh a ni a, kumin chhung hian lirtheia chetsualna thubuai 26 a awm a, mi 11 nunna chan awmin mi 10 an hliam a ni. Accident chhan tam ber chu Driver fimkhur loh vang a ni a, kumin chhung hian Case 159 convict tawh niin case 43 acquit a ni a, Conviction rate hi za zela 78.71 a ni bawk a ni.

Vawiin a Qurterly Review Meeting-ah hian tun hnaia Saiha leh Lungleia thil thleng tih loh chu a tlangpui thuin boruak a muanawm tih sawi lan a ni a, Police Officer te chu venhimna kawngah tun aia nasa a dan leh thupek kengkawh tur a hriattir an ni bawk a ni.