2906/2024-2025

Dated Aizawl, the 8th October 2024: Vawiin khan Administrative Training Institute Auditorium ah Mizoram Secretariat Service Association ten an Conference vawi 19 na an hmang a. Chief Minister Pu Lalduhoma chuan a hmanpui.

Thu a sawinaah Chief Minister chuan, MSSA hi sawrkar hnathawktu pawimawh tak, department tina inzarhpharh in ni a. Sawrkar inenkawlna dan lam pawh in hre tlang hle a, ram rawngbawlna tangkai tak thawktute in ni.

Kalphung tha zawk duha lo au thin kan nih ang ngeiin kan sawrkar hian mipuite tana rawngbawlna tha lehzual siam tumin hmalakna kan nei ta nual a. Hengah te hian sawrkar hnathawkten tha taka min thawhpui kan beisei. Tin, hnathawktu tha kan neih theih nan department tinah Service Review Committee kan dintir bawk a. Hnathawk thei lo emaw thawk tlak lo te dap chhuak a, a tul anga dan anga insingsak kan tum a ni. Sawrkar hnathawkte service quality a that hian kan ram quality a tha dawn a ni.

Information technology a thang chak em em a, kan nunphung a thlak nasa a. Sawrkar pawhin hei hi hman tangkai kan tum. Mipuite tana awlsamna thlen zawng zel a kal kan duh. Sawrkar hnathawkten technology thang zel mila kan inbuatsaih ve a ngai tih kan hrereng dawn nia.

Pawl leh kohhran lamah sawrkar hnathawkte kan inhman nasat lutuk hian kan nitin hnain a tuar ve thei a. Inhman dan tawk kan thiam a tha. Thawhpuite kep ngai reng, mahni thawhna hmuna hmuh harsa tak kan ni ang tih te hi a hlauhawm. Kan hna hi kan rawngbawl nana Pathian min hunna a ni a, kan ngaipawimawh ber tur a ni.

Reilote sawrkarna kan chelh chhungin Service Association hote hi ka hmu kim deuh vek tawh a. Service rivalry hi a nasa hle mai tih ka hmu. Hei hi tihdal ka duh. Thawhho vek kan ni a, kan hnain a tuar ang tih ka hlau thin. Tuihnar pakhat ringza vek kan ni a, in chanvo hi a awm zel dawn tih hre tlang ang u. Tin, kan hnuaia thawkte welfare kan ngaituah tawk lo thin niin ka hria a. Kan hnathawk hnuaihnung lam te hmathatna hi i ngaihthah lovang u, post ruak hnawhkhah kawngah pawh a hnuailam a kawrawng lutuk niin kan hria. Hei hian nakin zelah harsatna min siam thei a ni, a ti a. Sawrkar flagship programme Handholding chu ngaihpawimawh hmasaa lo nei zel turin a chah bawk.

Pi Betsy Zothanpari Sailo, President, MSSA pawhin thusawiin, Mizoram Secretariat Service Association hi kum 2004 a ding tan, Mizoram Ministerial Service atanga group A chin te unit hrang anga kal ta an nih thu a tarlang a. An service association kalphung leh hnathawh tlangpui a sawi bawk. Chief Minister-in a hun chep tak kara an conference a hmanpui avangin lawmthu a sawi a ni.

MSSA hian tunah hian sanctioned post 260 neiin Officers member 261 an awm mek a ni.