3708/2023-2024 

Dated Aizawl, the 7th February, 2024: Vawiin khan MRB Head Office Conference Hall, MINECO ah NABARD bultumin Mizoram State Credit Seminar, 2024-25 buatsaih a ni a. Pu Lalduhoma, Chief Minister khuallian niin, Pu PC Vanlalruata, Minister, Agriculture chu khualzahawm a ni.

State Focus Paper- 2024-25 a tlangzarh zawhah thusawiin Chief Minister hian, seminar buatsaihtu NABARD chungah lawmthu a sawi a. Mizoramah NABARD kaltlanga hmasawnna hnathawh a tam em em a, hmachhawp pawh kan ngah hle, an tangkai hle a ni, a ti. Thlai chinna tur Short term loan (KCC) chungchang uar zawka mipuite hnena thehdarh tha a tih thu te, PACS kan neih te mumal leh uar zawka hman tangkai tha a tih thute, Self Help Group te tana sum leh pai remchang tam zawk siam tha a tih thute pawh a tarlang. Thlai tharchhuah lam te, thilsiam chhuah lam leh services tha siam thei te - tanpui turin Hand Holding Policy kan kalpui dawn a, central sponsor schemes te nena kaihkawp tur niin; bank ten mawhphurhna pawimawh tak in chelh dawn a ni. A dawngtu tur beneficiary thlan thuah ruling party mi leh sa, hlawhtling lo tur tih chiang reng te kan duhsak ve ngawt dawn lo. Chung mite vang chuan Sawrkar policy a lo hlawhchham fo tawh a, bank te pawhin an hnena loan pek in hreh thin tih kan hria a ni. Tumah duhsak bik leh duh loh bik nei lovin, mipui sawrkar kan nih angin, a hlawhtlinpui ngei turte chauh kan thlang dawn a, uluk takin line department ten an vil zui bawk ang. Chuvang chuan bank te tan chung mite lo puih chu a nuam zaih tawh dawn a ni, tiin sawrkar ruahmanna te a hrilh a. Mizoramin hma a sawn zelna kawnga tha thawhtu tangkai tak ni ngei turin Bank zawng zawngte kan beisei tlat a ni, a ti.

Pu PC Vanlalruata, Agriculture Minister pawhin thusawiin, kan ramah market thlir chunga thlai chin uar turin hma kan la a. A hun taka thlai chi tha an hmuh theih nana hmalak te, an theihna tipung tura farm mechanization uar zel te kan tum bawk. Hnathawktuten an mamawh hun tak zela sum hman hawh tur an neih theih nan nangni financial institution te hi in pawimawh em em a, lo inhawng zau turin ka ngen che u a ni, tiin a sawm a. PACS te pawh thuam thata tihchangtlun zel a ni dawn a ti.

Chief Minister leh Agriculture Minister te hian sawrkar scheme kaltlanga pek loan thahnem tak, bank hrang hrang te sanction order chu loan hmutute hnenah an hlan a ni.

Pu Prasada Rao, General Manager, NABARD, chuan kalkhawm te lawmna thu a sawi a. Dr Renu Sharma, Chief Secretary, Govt. of Mizoram,
Pu P Shimrah, General Manager, RBI,
Pu Rakesh Kumar Ravi, Convenor, SLBC,
leh Pi Sheryl L Vanchhong Chairman, Mizoram Rural Bank te pawhin thusawina hun an hmang a ni.