3707/2023-2024 

Khawzawl, 7th February 2024: Vawiin chawhnu khan Khawzawl District Addl DC Pu Lalfakzuala kaihhruaiin DC Meeting Hall, Khawzawl Dintharah kumin 2024 Chapchar Kut hman dan tur relin thutkhawmna neih a ni.

Thutkhawm kaihruaitu Pu Lalfakzuala chuan Chapchar Kut chu Mizote kut pawmawh tak a nih angin ropui taka hman ni se a duh thu a sawi a, hnam ziarang leh nunphungte chawinun leh vawnhim nana hman tangkai ni se, a ti bawk. Kalkhawmte chu kum danga lawm tawh thin dan aia tha hria an awm chuan thurawn pe hrehlo turin leh Mizo hnam ziarang vawnnun a chawikan a nih theih nan hmalak dan kawng ngaihtuaha tan lak pui turin a sawm a ni.

Meeting chuan kumin Chapchar kut chu Sawrkar in a hun tura a ruat March ni 1 ah Khawzawl Field No-1, Zuchhip Vengah hman ni se tiin a rel a, Kut pa atan Bawrhsap Pu K. Lalrohlua sawm ni se tiin kut thlengtu atan Khawzawl Suh Hqrs YMA Pu PC Rosiama  ni se tiin a rel. Vawiin meeting chuan Chapchar kut mumal taka hman dan tur rel turin Working Committee din ni se tiin a rel a, Working Committee rawtna te hi Committee pawmpui tura chhawp chhuah leh a ni ang . Kum danga tih thin dan angin department hrang hrangte chu mawhphurhna pek an ni a, Kut hlawhtling tak a nih theih nan an mawhphurhna theuh tha taka hlen chhuak tura ngen leh sawm an ni bawk.

Chapchar kut lawmnaah hian mi zawng zawng sawm ni se tih a ni a, he hunah hian Naupang hnam ziarang lang theia inchei nalh te bakah Miss Chapchar kut thlan ni se tih a ni bawk. Vawiin meeting-ah hian Khawzawl District chhunga department hotute bakah NGO hruaitute an tel tha hle a ni.