3706/2023-2024

Lawngtlai dated 7th February 2024: Vawiin chawhma khan DC Conference Hall, Lawngtlaiah naupang kum 6 hnuai lam, hmeichhe tleirawl, nu naupai leh nau pawm lai nei ten ei tur tha an hmuh ngeina tur leh an hriselna tih hmasawnna tur a kum 2024-25 chhung a hmalak dan tur relin District Convergence Action Plan on Poshan Abhiyan Committee-te chuan thutkhawmna an nei a. Pi Margaret Vanremmawii, SDO (S) chuan hun kaihruaiin Pu Vanlaldingliana, Assistant, Women & Child Development chuan thurel hrang hrang sawi zauna hun a hmang a ni.

Vawiin thutkhawmna ah hian Poshan Abhiyan Scheme in a huam naupang, hmeichhe tleirawl, raipuar leh nau pawm lai nei ten ei tur hrisel an dawn ngei theih nan leh an hriselna tih hmasawn nana thil pawimawh hrang hrang an dawn theih ngeina tur a Sawrkar department hrang hrang thawhho dan tur sawi a ni a. Tui thianghlim leh inthiarna felfai an neih theih dan tur te, an chenna leh zirna in, Anganwadi Centre te kawlphetha nen a thlunzawm a nih theihna tur te, hmathatna kim tak a an dawn theihna tur a Aadhar-a ziahluh an nih theihna turte sawi ho a ni a. Thlai thar hrisel leh thianghlim an neih theihna turin Anganwadi awmna hmun ahte chuktuah huan siam dan turte rel a ni. Heng hmalakna hrang hrang tihlawhtling tur hian Lawngtlai district-a Sawrkar department leh tlawmngai pawlte thawh ho a pawimawh thu tarlan niin hmalaknate uluk tak a enzui ni se ti a rel a ni. Thutkhawmna ah hian Women & Child Development, DPO, ICDS, Health & Family Welfare, DRDO, Food & Civil Supply, PHE, P&E, Horticulture, Agriculture, Education leh DIPRO-te member an ni.