3705/2023-2024

07.02.2024 : Vawiin khan Fire Prevention Week kal zelah  Local Administration Department leh Environment, Forests & Climate Change Department tangkawpin Village Council te pualin Kangmei laka inven pawimawhzia leh hemi kaihhnawiha thil tul dangte sawiin Google Meet kaltlangin awareness programme neih a ni.

He hun hi District Local Administration Officer Pu Moses Lalfakawma Tlau in kaihruaiin Village Council te chu kawng tam takah Vantlang tana thahnemngai taka thawktu an nih angin kangmei ven chungchangah pawh thawhhona tha lehzual zawk neihpui turin a sawm a. Vantlang inkhawm Gram Sabha te hmang tangkaia kangmei chugchang inzirtir nan hmang tangkai turin a chah a.

Mi tam zawk Lo neia eizawng kan nih angin kangmei tichhuak lo tura fimkhur turin a chah a. Kan hmanrua te chul mam tha a, tuaihnum thin tur te khawl thil enkawl uluk loh avanga kangmei chhuak thei  a nih thu a sawi. Tin, kawngba leh hlo har te pawh mumal taka samfai a, uluk taka vawngfai thin turin Village Council te a chah bawk. Kangmei avangin nungcha leh ramgaw kan neihte an chereuh  nasa hle a, boruak thianghlim leh kan tui hna te nasa taka a kiam tak thu sawiin Thapui thawh a Kangmei chhuak tur kan ven ho a ngaih thu a sawi bawk.

DFO Pu Lalduhthlana chuan Village Council ( VC) te chu kawng engkima hma la theitu an nih avangin sorkarin ‘Lo hàl hun’ a bituk March ni 13 chu ngaipawimawh tur te, an haumchhunga lo nei ten mei lam tha taka sial tur leh a thei chen chen a enpui thin turin a chah a. Tin,  tlangau ah pawh a theih anga tam puanzar tir turin a chah bawk. Thli beng lam chhut hmasa phawt a lo hal thin tur te, lo hal hunah pawh tlai ni nem hun te thlang thin turin a fuih. Village Council (VC)te hriatpuina tel lo chuan tumahin lo hal  lo turin a chah bawk.

Village Council leh DLFPC (District Level Fire Prevention Committee) ten thawhohna tha nei a Dan zawm lo te zawn chhuah leh hremna kawngah pawh engtik lai pawhin puih an in huam reng thu a sawi bawk.

Ram kang thelh kawngah mimal ram leh vantlang ram kang te inang khata en a, a thelh kawnga theihtawp chhuah turin a chah bawk.He hunah hian The Mizoram (Prevention & Control of Fire in the Village) Rules, 2001 pawh sawi tel a ni bawk.

He hunah hian Range Officer Pu Jonathan Lalhruaitluanga'n Champhai District chhunga kangmei chhuah dan leh a chhuah chhan tlangpui te sawi bawk.