2004/2023-2024

Dated Aizawl, the 25th September, 2023: Vawiin khan Mizoram State Cancer Institute, Zemabawkah Pu Zoramthanga, Chief Minister chuan Japan International Cooperation Agency (JICA) sum Rs. 700 crore senga sak tur Mizoram State Super Specialty Cancer & Research Centre lungphum a phum.

Lungphum inkhawm buatsaihah thusawiin Chief Minister chuan, he hun pawimawh leh ni chhinchhiah tlaka ka tel thei hi ka lawm hle a. Kan hriat angin Mizoram hian cancer vanga thihna kan tawk nasa em em a, he Research Centre hian chu kan harsatna chu nasa takin min tanpui thei dawn a ni. Hetiang taka nasaa min tanpui avangin Japan sawrkar leh JICA chungah lawmthu ka sawi a, s sakna hmun tur lah chu ka bial chhung Zemabawk a lo ni leh zel nen kan nihlawh hle a ni, a ti.  Kan rama cancer vei kan tam lutuk hi ka phak tawkin ka ngaihtuah ve nasa thin a, kan mithiamten an sawi angin zuk leh hmuam kan ti nasa lutuk hi a nih hmel berin a lang. Hei vang hian mipuiten nunphung hrisel leh thianghlimna lam kan uar deuh deuh a tul tak meuhvin ka hria. He hmunah hian Cancer enkawlna tha leh changtlung tak nei mah ila a pawimawh zawk chu cancer hospital luh ngai lo tura inbuatsaih hi a ni zawk a ni. Chutianga kan invawng chunga loh theih lohva luh ngaite tan helaiah Super Specialty & Research Centre changtlung tak kan lo buatsaih ve thung dawn a ni, tiin mipuiten nunphung thianghlim kan zawh a pawimawh thu a tarlang a ni. Sawrkarin hriselna leh zirna a ngaihpawimawh avangin covid harsatna kan tawh lai pawhin anni pahnih te tihhmasawn zel nan sum leh pai kan pe chhuak tha hle a ni, a ti bawk.

Khualzawhawm Dr. R. Lalthangliana, Health Minister pawhin thusawiin, Mizorama hmasawnna hnathawh malkhaia sum lian ber tur pakhat Super Specialty Cancer & Research Centre lung kan phum thei hi a ropui hle a, he dinhmun kan thlen theih nana tha thawhtute zawng zawng chungah lawmthu ka sawi a ni. NE India a la awm ngai lo, India huap pawha Cancer enkawlna leh zirbingna tha ber te zinga mi ni phak tura beisei a ni. Project sum zaa sawmhnih hi state sawrkarin kan lo tum ve tur a nih avangin Chief Minister in phal takin min remtih sak a, kan lawm hle. Kum 2028 ah chuan hawn hman theih ngei se kan duh dawn a ni, a ti a. Tun hnaia Health Infrastructure lama Mizoram hmasawnna dang te a tarlang bawk.

Pu Hajime Taniguchi, Senior Representative, JICA India Office pawhin thusawiin, India leh Japan sawrkar te thawhhona kawngah India hmarchhaka hriselna lam tihhmasawn hi a peng pawimawh a nih angin Mizoram sawrkar nena kan inbiak hnuah he ruahmanna hi JICA chuan a pawm ta a. Mizoramin state dangte entawn tlaka hmalak in tum dante kan hriatpui a, a chhuanawm kan tiin kan thawh ho thei hi kan lawm hle a ni, a ti a. Hriselna lama Infrastructure leh Human Resource lamah hma in sawnpui ngei kan beisei a ni, a ti bawk.

Dr. Jeremy L. Pautu, Project Coordinator cum Director, Mizoram State Cancer Institute chuan report tlangpui a pe a, he Super Specialty Cancer & Research Centre hian khum 200 awmna Hospital a nei dawn a, Cancer natna enkawlna khawl tha ber bera thuam a nih dawn bakah Research Centre a nih angin thawktute pawh khawvel huapa rintlak (world class) ni tura beisei a ni dawn a ni. Medical Safety lam pawh changkang taka kalpui tur a ni ang. A project pumpui man hi Rs. 700 crore a ni a, za zela sawmhnih Rs. 160 Crore hi Mizoram sawrkar lo tum ve tur a ni ang a, hna hi kum 2028 kumtawp lama thawh zawh hman beisei a ni.

Lungphum inkhawm hi Pi Esther Lal Ruatkimi, IRS, Principal Secretary to the Government of Mizoram, Health & Family Welfare chuan a kaihruai a, he Centre Mizoramin a neih theih nana an bultan dan tlangpui a sawi a. Kum 2017 a hma an lak tan thu leh hmalakna hrang hrang an neih hnua February ni 23, 2023 a JICA nena inremna an ziah theih tak thu a tarlang a ni. Rev. Laltanpuia Colney in hunserh hmangin Dr. Vanlalsawma, Project Director cum Principal Director, Health & Family Welfare chuan lawmthu sawiin inkhawm a khar a ni.