2003/2023-2024

Aizawl the  25th September, 2023:  Vawiin chawhnu khan Durbar Hall, Raj Bhavan, Aizawl-ah khawvel puma bengngawngte puala ni bik "World Day of the Deaf" chu hman a ni a. He hunah hian Governor Dr.Hari Babu Kambhampati chu khuallian niin Dr.R.Lalthangliana Health Minister chu Kualzahawm a ni thung.

He hun pawimawh takah hian Governor chuan Bengdar mamawh tu zirlai thlanchhuah 320 hman turin Bengdar tha chi, pakhat Rs 20,000/- chuang man, a vaia belhkhawm a Rs 6.4 Crore man, COAL India Limited hnuaia Corporate Social Responsibility(CSR) atanga Deen Dayal Sravana Foundation (DDSF), Andhra Pradesh in lakchhuah chu  a sem chhuak nghal a ni.

Governor Dr Hari Babu Kambhampati chuan Mizorama zirlaite zinga Beng lama harsatna nei te tana thil tangkai tak COAL India Limited hnuaia CSR kaltlanga hmuh a nih theih na atan thawktu pawimawh tak Deen Dayal Sravana Foundation (DDSF) chungah lawmthu a sawi hmasa a. Mizorama zirilai beng lama harsatna nei te zawn chhuah a nih kawnga hmalatu Helath Minister Dr R.Lalthangliana leh a hnuaia hnathawk, Health Department official te chungah lawm thu a sawi  bawk.

He hmalakna a lo chhuah dan sawiin Andhra Pradesh-ah Bengdar a thlawna sem a ni tih a hriat veleh, Mizoramah sem a nih ve theih nan theihtawp a chhuah nghal tih a sawi a. Mizoram Sawrkar lamah Health Department hotute a sawipui hnuin vawiinah Khawvel pum huapa Ni pawimawh tak, "World Day of the Deaf" pualin sem theih a lo nit a tih a sawi. He ni pual hian, beng lama harsatna tawk te chu khua leh tui ten kan theih angin kan tanpui a ngai a ni tih a sawi bawk. Governor chuan Ministry of Social Justice and Empowerment hnuaiah Disabled persons for purchasing / fitting of aids / appliances (ADIP) kaltlangin Beng lamah harsatna nei te tan tanpuina a dawn theih tih a sawi a.ZMC pawh hemi kawnga hmala thei torah ruat zingah a tel niin a hriat thu leh hun reiloteah ZMC kaltlanga he hmalakna hi kalpui a nih tur thu a sawi bawk.

Health Minister Dr R.Lalthangliana chuan Governor thahnem ngaihn zarah a sum zawnga the pawha cheng tam tham tak senna tur, zirlai beng thalo te tana thil tangkai tak tih a lo nit a chu a lawmawm hle tih a sawi a. Bengdar semchhuah tak te rawn la chhuak tu Deen Dayal Sravana Foundation (DDSF) chungah lawmthu sawiin tuna an hmalaknaah tawp mai lova, Mizoramin a mamawh anga hmalkna huang rawn zauh zelin turin a sawm nghal bawk a ni. Dr R.Lalthangliana chuan he hunah hian Health Department hmalakna hlawtling tam tak zinga langsar zual – India rama naupiang 1000 zel atanga chhuta dam khawchhuak tamna ber state Mizoram a nih thu bakah NITI Aayog tehna atanga state te zinga Health sector a titha ber nihna Mizoramin a hauh thu te pawh a sawi lang a. Health Department hnathawkte chu tanlan chhunzawm zel turin a fuih bawk a ni.

Vawiina World Day of the Deaf puala hun hman hi Chairperson Pi Esther Lal Ruatkimi, Principal Secretary H&FW-in a kaihruai a. Chairperson-in kalkhawmte lawmna thu a sawi hnu-ah Dr.Lalramnghaki ENT Surgeon, NPPCD, Civil Hospital Aizawl hnen atangin kumina World Day of The Deaf  thupui,"A world where deaf people everywhere can sign anywhere” tih hmangin Presentation thlir leh ngaihthlakho a ni a. Dr.Lalramnghaki chuan kumin thupuiin a huam chhungah, September ni 19 atanga ni 25 inkar chhungin nitin thupui thlan chhuah pasarih (7) a awm thu te, hemi hun chhung hian bengngawng ten khawtlangah chanvo leh pawimawhna an neih, an harsatna hrethiama anmahni pawm thiamtu kan nih a pawimawhna leh chung thilin khawtlang leh ram pum huapa rah duhawm a thlen ngei theih nana tan lak pawimawhnate a sawi a. Sign Language pawimawhna, bengngawngte  eizawnna ngelnghet ngaihtuah, an hriselna ngaih pawimawh sak, hun harsa a lo thlena venhim leh chhawmdawl dan tur bakah an danglamna a tul anga thliar hransak thiam a pawimawhnate a tarlang a ni.

 He hunah hian Dr.Thota Venkata Sarvarayadu, Independent Director, National Fertilizers Ltd. hnen atangin thusawi ngaihthlak a ni bawk a ni. Hemi hnu hian Governor Dr Hari Babu Kambhampati chuan Bengdar a sem chhunzawm a. Program a tel tura sawm, Redeem Garden & Ephatha Special School atanga school naupang thlan chhuah mi sawmhnih pakhat (21) bakah Ephatha Special School naupang pali (4) an vaiin naupang sawmhnih panga (25) te hnenah bengdar hi a sem a  ni. 

Vawiina NPPCD kaltlanga beng dar sem chhuahte hi Call India Limited ten an CSR hmanga an rawn sponsor a ni a. Call India Limited te hian NGO Partner atan Deen Dayal Sravana Foundation (DDSF) an hmang a. Anni nena thawk hovin National Programme for Prevention and Control of Deafness (NPPCD) thawktu te chuan Mizoram chhunga Bengngawng, bengdar vuah ngai zawn chhuah hna nasa takin an kalpui a. Kumin Bengngawngte Ni pual hian heng bengdar hi sem chhuah thawh khatna hi Governor hova neih a ni ta a ni. 

Vawiina Governor hova hun hman a nih mek lai hian DHME Conference Hall, MINECO-ah Bengdar vuah ngai mi 177 dang te chu koh khawm niin an measurement (Ear Mould Inpression) lak a nia. Vawiin bika Aizawl district leh a hnaivaia district dang atanga bengdar vuahsak turte measurement lak sak zat chu: Aizawl East-103, Aizawl West-8; Kolasib Dist-32, Mamit Dist-11, Saitual Dist-1, Serchhip Dist-22 avaiin 177 a ni. 

September ni 27, 2023 hian Lunglei Civil Hospital-ah Lunglei Dist-36, Hnahthial Dist-4, Lawngtlai Dist-24, Siaha Dist-1 a vaiin mi 65 te ear mould impression hi tihsak an ni ve leh ang a, Champhai district-a mi 67 te tan pawh hetiang hun hi remchang hmasa bera neih ve leh nghal tur a ni a. Heng hi zawh fel a nih chuan Call India Limited ten, Deen Dayal Sravana Foundation kaltlanga bengdar an pek turte hi mi 334 lai an tling thei dawn niin Dr Lalthanmawii Khalthang, Consultant NPPCD chuan a sawi a. Beng dar hi kumin October thla chhunga sem chhuah hman vek an inbeisei thu a sawi bawk.

Vawiin a Bengngawng te ni hmanna hun hi Dr.Vanlalsawma, Principal Director, Health & Family Welfare Department chuan lawmthu sawiin hun hnung a khar a ni.