2002/2023-2024

Champhai the 25th September, 2023 - Cheng nuai 105.57 senga sak, Conservator of Forests, Eastern Circle Office Building Champhai Bethel ami chu vawiin khan Pu TJ Lalnuntluanga, EF&CC Minister chuan a hawng a, Dr. ZR Thiamsanga, Vice Chairman, Health & Family Welfare Board chu khualzahawm a ni.

Khuallian Pu TJ Lalnuntluanga, EF&CC Minister chuan Conservator of Forests, Eastern Circle Office hawn thar chuan ram leh ngaw humhalh chungchangah te leh kan Environment humhalhna kawngah Forest Department tha nasa takin a ti chak dawn a ni, a ti a. Forest Department chuan finchhuah tu an mamawh thin hle tih a sawi a, finchhuahna tur an hriat phawt chuan inthlahrung lova thurawn pe zel turin kalkhawm te a sawm a, Conservator of Forests, Eastern Circle Office Building Champhai a hawn theih a nih chhan pawh thurawn an dawn vang niin a sawi a, a hlawntlin theihna tura kawng tinrenga thazung senga thawktute chungah lawmthu a sawi a ni. 

Champhai chu Internaltional Boundary a awm anih angin ramsa man a tam hle tih a sawi a, heng an ramsa man te enkawl zui zel dan turah buaina leh harsatna an tawk fo tih sawiin, heng ramsa man te hi enkawl zui an nihna turin hma lak a nih thu a sawi a, Rescue Centre dinna turin Cheng nuaih 1091 sanction tihfel a ni tawh tih a sawi a, kar thar ah chuan lung phum hman tum a nih thu a sawi bawk. Ramri a duty tur Protection Squad chu Sawrkar Laipui ah dilin mi 50 chin phalsak an nih tawh thu sawiin State dang dil te zinga hlawhtling awmchhun an nih thu a sawi a, heng mi 50 te hi staff indaih lohna phuruk na atan hman an nih tur thu a sawi bawk.

Champhaiah Botanical Garden leh Nature Learning Centre changtlung tak nei tura hmalak mek anih thu sawiin, khawpui chhung Ngaw siam turin Nagar Van buatsaih a nih thu a sawi a, khaw 14 ah te hna thawh mek a nih thu a sawi a, Champhai hi khualzin hip na hmun pawimawh taka hman an tum thu a sawiin Swadesh Darshan 2 hmangin tlangsam ah hmalakna tur hrang hrang an neih thu a sawi a, kum thar ah chuan Champhai hmelthar a neih tan tur thu a sawi a, Champhai hi National Meeting pawh thleng ngam tur khawpa siam mek a nih thu a sawi bawk.

SASCI sum cheng nuaih 1500 hmangin ramri insumdawn tawnna chu tihchangtlun mek a nih thu a sawi a, Champhai North Bialtu MLA Dr. ZR Thiamsanga ngenna angin Murlen Sanctuary kal kawng leh a hmun te a theih ang ang a chei that a nih tur thu a sawi bawk. District Court sakna tur Central ah an dil fel thu leh sunction pawh tihfel a nih tawh thu sawiin rei lote chhungin tender chhuah hman beisei a nih thu a sawi a, Mizoram ah chuan Court tha ber tur sak an tum thu a sawi a, vaibelchhe 49 man vel a ni dawn tih sawiin building chauh ni lovin Staff te ah pawh hmasawnna tam tak hmuh tur a awm thu a sawi bawk.

Pu TJ Lalnuntluanga chuan Forest Department-a thawktute chu anmahni dawr thin tu mipuite hawihhawm taka dawngsawng thin turin a chah a, thawktute chungah beisei na a neih san thu sawiin tuna Building thar an hawn tak pawh hi mipui leh ram tan tangkai taka hman a nih a beisei thu a sawi bawk.

Khualzahawm Dr. ZR Thiamsanga, Vice Chairman, Health & Family Welfare Board pawhin thusawiin Champhai District tana chhinchhiah thlak tak Champhai in a nei thar leh chu lawmawm a tih thu a sawi a, Nursing School hman theih tura hawn a ni ta te, Transport Department Office Building thar hawn a ni leh ta te chu Champhai tan hmasawnna ropui tak a nih thu sawiin, hemi atana thawktu zawng zawngte fakawm a tih thu a sawi. Hripui te, lirnghing te, kangmei te, Ram thenawm leh State thenawm a Zohnahthlak te harsatna nasa tak tawk avangte in Sawrkar in hmathlir an nei tam tak an tihlawhtling thei lo chu pawi a tih thu a sawi a, mi harsa zawkte dawmkanna tur leh SEDP pawh tum anga kalpui a nih hleihtheih loh phah tih sawiin chumi lai kara Champhai tan hmasawnna ropui tak tak hmuh tur a  awm thin chu lawmawm a tih thu a sawi bawk.

Mizoram ah hriselna kawngah pawh hmasawnna hmuh theiha a lan mek thu a sawi a, India ram State te zingah nausen thi tlem ber State kan nih thu a sawi a, Champhai ah cheng vaibelchhe 20 senna tur Critical Care Hosputal sak hna thawh tan mek a nih thu a sawi a, harsatna tam tak karah an duh angin hnathawk thei lo mahse an theih ang tawkin hna an thawk tih mipuiten hriatsak turin a ngen a ni. 

MLA chuan Green India Mission Mizoramah kalpui mek a nih thu sawiin Champhai ah pawh kalpui a nih thu a sawi a, ramngaw kan humhalh that loh chuan kan tui hna te a kangchat vat thei tih a sawi a, khawvel pumhuap ang pawhin ramngaw humhalh hi buaipui nasat ber pawl a nih thu sawiin Champhai mite pawhin ramngaw humhalh kawngah tan la thar deuh deuh turin a sawm a, Ram leh hnam humhalh kawngah pawh tan la thar a, chi bing leh hnam bing te awm lova, ruihhlo lakah fihlim a, inpum khatna leh inlungrual taka awm a hun tawh hle tih a sawi bawk.

He hun hi Pu James Lalrinchhana, District Bawrhsap chuan a kaihruai a, Rev. Dr. Rualthankhuman hunserh a hmang a, Pu Pee Lee Ete, IFS, CF chuan kalkhawm te lawmna thu sawiin Pu F. Lalduhthlana, IFS, DFO Champhai hnen atangin Building sak dan report ngaihthlak an ni a, Pu RS Sinha, IFS, Principal Secretary & PCCF hnen atangin thusawi ngaihthlak a ni bawk.

Conservator of Forests, Eastern Circle Office Building hi cheng nuaih 105.57 hmanga sak niin November ni 29, 2022 atang khan sak tan a ni a, April ni 5, 2023 ah lungphum phum a ni a, September ni 23, 2023 ah khan sak zawh fel a ni. Building zau zawng hi sq.ft. 2817 a zaua sak a ni a, tui dahkhawlna ltr 46,954 a zau dah a ni a, Building chhung ah hian room 8 dah a ni bawk.