2001/2023-2024

Champhai the 25thp July, 2023 - Ruantlang Water Supply Scheme (Solar Pumping) chungchang puanzarna hun tukin khan Ruantlang Branch YMA Hall ah hman niin Pu TJ Lalnuntluanga, EF&CC Minister chu khuallian a ni.

Pu TJ Lalnuntluanga chu thusawiin, mahni khua hmasawnna tur chu a rilru a lian tak a nih thu a sawi a, tuna a dinhmun a thu thei tura siamtu Champhai mipuite tan theihtawp chhuah a tum tlat thu a sawi a, Champhai hmasawnna tura hna thawh an tum mek laiin Hripui alo leng ta si a, Champhai hmasawnna aiin Mihring damchhuahna tur ngaihtuah a ngaih tak thu a sawi. Hripui alo ziaawm hnuah ran lamah hri a leng leh tih sawiin lirnghing in min nuai leh bawk nen hun khirh tak kan tawng chho zut zut tih a sawi a, chutihlai karah hmasawnna kawng theihtawpin an zawh tih a sawi a, Ruantlang khaw tan pawh a theih ang anga hma a lak thu leh BDO Office tur chang tlung tak a siam mek niin hawn theih tep a nih tawh thu a sawi a, Ruantlang khua hian hma a sawn zel dawn tih a sawi a ni.

Champhai Greater Water Supply Scheme atang tui kan lak te kan khawp kham tawh lo hle tih a sawi a, Ruatlang chawmtu tur tui lakna chungchangah tui lakna tur hmun te enkual a nih hnuah Khelthliah atanga tui lak nise an tih thu sawiin hemi atan DPR pawh siam tawh a nih thu a sawi. Ruantlang Water Supply Scheme hlawhtlinna tur hian nasa taka hma alo lak tawh dan a tarlang a, project tam tak awm karah a hma pawla tihhlawhtlina  nih theihna turin kawng hrang hranga hmalak a nih thu sawiin a hmasa bera hmalak tura tih a nih tak thu a sawi a, mi 1700 vel hmang tur an awm laiin mi 6000 vel hman theih tur tui pump chhuah a nih dawn avangin an thenawm veng tui harsa te puih inhuam turin a chah a, midangte tana malsawmna ni turin duhsakna a hlan bawk.