775/2025-2026

Aizawl the 9th June 2025: Vawiin khan Chief Minister Pu Lalduhoma chuan Irrigation & Water Resources Department Auditorium, MINECO ah World Bank suma din Mizoram Water Informatics Centre a hawng.

A hawnna thu a sawinaah Chief Minister chuan, hmun 82 atanga tui data chi hrang hrang, darkar tina min hrilh hre thei centre changtlung tak kan ta hi thil lawmawm leh scientific lama kan ram hmasawnna chhinchhiahtlak a ni. Hetiang centre changtlung kan lo neih tak avangin, tui lam data mamawhtu department leh institution ten he centre hi ring tlang ila, data thuhmun hmangin hna thawk ila a tha hle ang, a ti.

National Hydrology Project hnuaia National Water Informatics Centre chuan state zawng zawng mamawh min phuhruk zo lo va. State Centre lo neih theih hi central sawrkar lam duh dan a lo ni bawk nen, he centre din hi kan remti ta a. Sum leh pai hi World Bank lamin an tum a ni, a ti.

Sawrkarin tui hmang tangkai tura ruahmanna a siam tlangpuite a tarlang a. A langsar zual te chu Mat Multipurpose Dam siam a nih tur thu te, Vapar rama multipurpose Dam siam theihna tha tak awm chu zirchian mek a nih thu te leh power siamna lama ruahmanna an neih te a ni. Tin, mipuiten ruahtui khawlkhawm uar a tul thu sawiin furah tui kan pump theih loh ni a lo thleng fo va, ruahtui tam tak dawng siin tui kan nghei lek lek thin. Ruahtui dahkhawlna tha hi in tinin neih i tum ang u. Aizawlah phei chuan AMC hian ruahtui dawn khawmna nei lo tur chu insak hi phal tawh lo mai se a tha lawm ni, tih ngaihtuahna te ka nei rum rum thin, tiin ruahtui dahkhawlna tha neih a tulzia a sawi bawk.

Chief Minister hian, data dik leh rintlak neih chu project rintlak siam tura kan mamawh hmasa a ni zel a, tuiah chauh ni lovin thil dangah pawh data dik nei turin department te ka chah thin. Budget kan pharh pawhin data dik tak hmang turin thawktute ka hrilh. Kan lan danah kan lo tlahniam deuh a nih pawhin kan dinhmun dik tak hriat tluka hlu a awm lo. Data dik kan neih hian kal dan tur dik kan duang chhuak thei dawn a, data dik lo behchhana project siam chu dawt rinchhana thusawi ang tho a ni, tiin data dik neih a pawimawhzia pawh a tarlang a ni.

Chief Minister hian Tlawng Lui Lian tur Hriatlawk theihna (Tlawng lui Early Warning System) chu a hawng nghal a. He system hi DM & R department nena enkawl tur a ni.

Khualzahawm Pu PC Vanlalruata, IWRD Minister pawhin thusawiin, Mizoram tana ni chhinchhiaktlak a ni a. Chief Minister ngeiin min hawnsak hi kan lawm hle. He centre a puitlin theih nana thawktute chungah pawh lawmthu ka sawi a ni. Water management lamah hian ruahmanna kan nei nual a, tuihna tihpun dan te pawh hmun hnihah kan enchhin tawh a, a hlawhtling a. Chu mi method hmang chuan Tlawng tuihna tihpun kan tum a, Bramaputra Board ah Project Rs. 70 Cr. chuang man kan thehlut a, min pawmsak tawh a ni. Project dang dang pawh kan siam a, IWRD hi Department lian lo tak ni mah ila, kan ram tan hmalakna lian tak neih kan tum mek thung a ni, a ti. Minister hian Rain Water Harvesting App a tlangzarh nghal a ni.

Inkhawm hi Er. Lalrothanga, Secretary, IWRD in kaihruaiin kal khawmte lawmna thu a sawi a, he centre hi centre of Information ah chauh ni lo va centre of transformation a siam kan tum a. A mamawhtu apiangte hman theihin kan kalpui dawn a ni, a ti.

Er. K. Hamlet, SE ( P & M), Director, Mz-SWIC chuan centre hnathawh dan tur chipchiar takin a sawifiah a, he centre hi Mizorama tui kaihhnawih hriat tur pawimawh zawng zawng hriat theihna tura ruahman a ni a. Lui tui luang zat te, ruah tui tla zat te, boruaka tui hu awm zat te, lei hnuaia tui level te leh sik leh sa lam data kan neih theihna turin hna a thawk ang. Mizoram hmun 82 ah heng data lakkhawmna hmun hi bun fel vek tawh a ni a, centre-ah hian darkar tin data an rawn thawn thin ang. Mizoram Water Resources Information System leh Tuilian Warning System pawh he centre kaltlang hian siam a ni.

Mizoram State Water Informatics Centre hawnnaah hian Pu Lalthansanga, Minister, EF & CC, Pu Lalfamkima, Deputy Speaker, MLA, official leh sawm bik te an tel a. Er. Lalrotluanga, CE, IWRD chuan lawmthu sawiin inkhawm a khar a ni.