774/2025-2026

9th June, 2025 : Vawiin khan Commerce & Industry Department buatsaih in Thingsulthliah Diakkawn YMA Hall ah National handloom development programme, hnuaiah Puantah tute hnenah Puantah In sakna tur Rs 60000/- 1st installment pek an ni.

Minister chuan tanpuina dawngtute chu a lawmpui thu sawiin, tanpuina an dawn chu a hmanna tur dik takah an hman a, taima taka puan an tah chuan eizawnna tlak, chhungkaw chawmna tlak an thawk chhuak thei a ni a ti a. Eng hna pawh thawk ila, hlawhtling tur chuan beidawng lova tih tak tak a ngai a, Sawrkarin tanpuina min pek hi hmang tangkai ila, hlawhtling ngei turin tih takzet in hma kan lak chhunzawm a tul a ni a ti.

India ram hmun hrang hrang mai bakah, Sapram thleng pawhin mizo kutchhuak puan thawn chhuah a nih thu sawiin, Minister chuan puantah hi eizawnna tha tak a ni a, Mizo te hian hmeichhe thawh turah kan ngai thin, mipa tan pawh puantah hi eizawnna tlak, hna tha tak a ni a ti bawk.

Sawrkar Laipuia Ministry of Textiles hnuaiah Thingsulthliah cluster ah puantah tu mi 50 hnenah tanpuina tur sum dawn a nia. 1st installment atangin mi 10 hnenah puantah In sakna Rs.60,000/- theuh pek an ni. Heng mite hian Puantah Khawl puan an tah theih mai na tur an dawng leh dawn bawk a ni. A dang zawng te hi chuan 2nd installment hmuh hun ah an dawng leh ang.

He Programme  Pi Maria CT Zuali IAS Director Commerce & Industry Department in a kaihhruai a, Technical report Pu PC Lianchungnunga Promotion Officer C&I, in a pe a ni.