2667/2026-2027

Aizawl the 14th October 2026: Vawiin khan Chief Minister Pu Lalduhoma chuan Assembly Annexe Conference Hall-ah Mizoram Tourism Conclave 2026, ni hnihna a hmanpui a. Pu Lalnghinglova Hmar, Minister, Pu Lalmuanpuia Punte, Adviser to CM, Lt. Col. Clement Lalhmingthanga, MLA ten an tawiawm. He conclave thupui hi "Investing in Mizoram CAN (Culture, Adventure and Nature for Sustainable Development) tih a ni.

Thu sawiin Chief Minister chuan, tun hnaiah Sairang thlengin rel a lo kal a Mizoram chu tlawhpawh awlsam zawk a lo ni a. Khualzin tam takin min rawn tlawh zui ta a ni. Kuminah pawh September thla thleng khan khualzin hi nuaih 6 vel kan nei tawh a, an pung zel turah kan ngai a, khualzinte thlenna tur kan neihten an dawl zo lo lam a ni. Chuvang chuan, Tourism lama Mizorama investment neih hi investor-te tan hmalakna tha tak a ni tawh a ni.

Khualzin tam zawk kan neih zel theih nan sorkar laipui nena tangdunin tunah hian hmun hrang hrangah Rs. 681.16 Crore man Infrastructure kan siam mek a, heng hmalakna kan kalpui theih nana sum leh pai min petu Ministry of Tourism te, Ministry of DoNER leh NITI Aayog te chungah kan lawm hle a ni. Kan state flagship scheme Banakaih atangin Rs. 11.10 Crore man tur kan duang mek bawk.

Tourism lama hmasawn zel hi kan tum avangin thingtlang lamah pawh hma kan la a. Mipuite nena tangruala kal (Community Based) kan uar a. Tun hnai lawkah pawh Banakaih, CSR leh PM JUGA atanga thawh tur homestay thar 199 siamna tur kan hawng (launch) a ni.

Khualzin an lo luh tam zel theih nana kan lungphum pawimawh pathum han tarlan ka duh chu:

Zo nun ze mawi tak tak te, khawtlang ralmuang leh faina leh thianghlimnate hi kan hmanraw tangkai an ni.

Adventure lam thil Paragliding competition te, Half Marathon te, Cycling leh hetiang lam thilte hian khualzin an ko khawm a.

Kan ram hring mawi tak, kan tlang leh ruam hmuhnawm tak tak, kan lui, kan Wildlife Sanctuary te hi khualzin hip khawm thei kan ram rohlu an ni, tiin Mizoramin khualzin a hip khawm deuh deuhna atana thil pawimawhte a tarlang a. Heng thilte behchhana investment kalpui turin kalkhawmte hi a sawm a ni.

Conclave hmang tura kal zawng zawngte chungah lawmthu a sawi bawk.

Pu Lalnghinglova Hmar, Minister Tourism pawhin thu sawiin Mizoramin Tourism lama hma a lakna te, remchanna tam tak a neih dan te a tarlang.

A ni hnihna inkhawm hi Dr. Lalrozama, IAS, Commissioner & Secretary chuan a kaihruai a, Pu Vanlaldina Fanai, Commissioner & Secretary chuan Conclave an buatsaih chhan leh thiltumte a sawi a. Dr. Lalrinchhani, DD, Tourism chuan Mizorama Tourism investment kalpui thatnate a sawi a. Mizorama tourism behchhana eizawnna kalpuitute hnen atangin an tawnhriat ngaihthlakna neih a ni bawk.

Chawhnu lamah Aijal Club-ah state hrang hrang atanga kalten Business to Business session an nei chhunzawm a ni.