2329/2024-2025

Dated Serchhip, the 1st October, 2024: Vawiin khan Chief Minister Pu Lalduhoma chuan Govt. Serchhip College ah PM DevINE sum atanga siam 3D Dental Laboratory thar a hawng. He Laboratory hi Serchhip District Hospital-a dah tur a ni a. District Hospital hi sak thar mek a nih avangin 5G Internet Service awmna Serchhip College-ah hian bun rih a ni. Hemi rual hian District Hospital-ah Mobile ECG Device leh Drip Monitoring system te pawh hawn an ni a. Chief Minister a nih hmaa hma a lo lak tan tawhna te an ni. 

Laboratory thar lawmna inkhawm hi Serchhip DC Conference Hall ah Pu Lalrinzuala, Addl. DC kaihhruaiin buatsaih zui a ni a. 

He hunah hian Chief Minister chuan, he hmalakna a hlawhtlin theih nana thawktute chungah lawmthu ka sawi a. Ha siam tur nei te tan awlsamna nasa tak a pe dawn a, mi tam takin an chhawr tangkai ka beisei. He Laboratory hi NE state tinah dah thar vek a ni a, AMTRON ten Guwahati atangin an thlung khawm ang a. Training pawh anni hian an rawn buatsaih thuai ang. He hmasawnna thar hi Industrial Revolution 4.0 an tih huanga mi, 5G connectivity service leh 3D printing technology huanga mi a ni. A changkang em em a, a che rang bawk a. Ka bialah ngei kan han hawng hmasa thei hi ka lawm hle. 5G high speed internet hmanga telemedicines hmalakna dangte pawh kan ngaihtuah chho zel dawn, a ti. 

Serchhip district hospital building thar tur sak mek a tlawh thu tarlangin, PGCIL in an CSR Rs. 21 Crore min pek bakah hian central sawrkarin a phal chi Rs. 50 Crore kan pek belh ang a. Rs. 71 Crore in District Hospital thar tha tak neih kan beisei, a ti bawk.

Tin, tun hnai khan NEC digital tourism project hnuaiah Serchhip thalai 15 te chu IHM Delhi-ah ni 45 chhung awh hospitality sector training pek an ni a. Chung mite hnenah chuan Chief Minister hian certificate hlan nghal bawk.

Pu Paul L. Khuma, DC chuan kalkhawmte lawmna thu a sawi a, Pu Ashish Anand, Adviser, AMTRON chuan technical report pe pahin 3D leh 5G technology hmanga hmalak theihna la awm te a tarlang. Dr. Lorho S Pfoze, ex Vice Chairman, NE MPs Forum leh Pi Sherry Lalthangzo, Economic Adviser, NEC pawhin thusawina a nei a ni.

Inkhawm hi Dr. LP Malsawma, Sr. CMO, Serchhip chuan lawmthu sawiin a khar a ni.