Chief Minister Pu Lal Thanhawla chuan vawiin khan Vanapa Hall-ah India rama hmasa ber tur United Nations Organisations peng hrang hrang in a Eco System siam that hna leh humhalh tura beihpui thlakna tur bul tanna, United Nations Joint Initiative Project in Mizoram chu a hawng. Bul tanna hawn anih hma hian Mizoram sorkar leh UN Team hian Inremna Thuthlung an ziak a, Mizoram sorkar aiawhin Chief Secretary Pi L.Tochhong in hming signin UN aiawh hian Pi Lise Grande, UN Resident Coordinatorin hming a sign ve thung a ni.

Chief Minister chuan India rama la awm ngailo Mizoramah a hmasa ber tur atana United Nations Organisation peng hrang hrangin ecosystem based livelihood atan UN Joint Initiative Project an rawn kalpui tur chu a lawmawm tak meuh a ni a ti a. He project siam tura UN Team ten tha leh zung an sen nasatzia leh hemi atana Mizoramah tum hnih ngawt an lokal chu an fakawm hle a ni a ti a. Mizoramin mirethei,chanhai leh pachhiaten leirem an rah theihna tura sorkarin programme a kalpui mek tihhlawhtlinpui tur leh chak zawka hmasawnna kan neihna tura kawng min rawn dap saka, khuanu min pek ram leilung, nungcha leh thing leh maute a humhalh dan tha zawk min kalpui tur hi a phurawm hle a ni a ti.

Chief Minister chuan he project rawn pianchhuah dan sawiin, ni 29 December 2012 a New Delhi ah mithiam rual kalkhawmte hmaa NLUP thil tum an tarlanna rah a nih thu a sawi a. Hemi tuma UNFAO aiawha tel Dr.Peter E.Kenmore chuan NLUP chu UN thil tum nen thuhmun nia a hriat avanga University of Minnesota (USA) atanga mithiam a rawn tirh ten Mizoram dung leh vang tlawh kuala thil chi hrang hrang zira, kuthnathawktute an kawmna rah kal zel a ni tiin, UNO chungch lawmthu a sawi nawn a. Chief Minister chuan UN Teamte hi an thil tumah an chiang a, keimahni zawk hi kan chiang lovang tih a hlauhawm a, an hnung kan zui zo lovang tih ka hlau a ni a ti.

UN Resident Coordinator Pi Lise Grande chuan project thil tum ber chu ecosystem siam that leh hun lokal zel tur atana humhalh a ni a ti a. Mizoram hmun ralmuang leh boruak duhawm awmna a ni tiin, hnathawhna ah pawh a ram leilung faten thil an lo kalpui dan thin tha lai awmte chu hman ve thin a ni ang a ti bawk.

Chief Secretary Pi L.Tochhong chu lawmna thu sawiin he Project avang hian hi Mizoramah thil chhinchhiah tlak a thleng a ni a ti a. UN Team te inpekna hian Mizoramah rah tha a thlen ngei a beisei thu a sawi bawk.

He project hi kum 2014 - 2017 chhung atana ruahman a ni a. Senso ngai tur hi hemi hun chhung atan hian US Dollar 4,000,000/-(India pawisa chuan Rs.2,454/- lakhs) UN hian a tum dawn a, Mizoram sorkarin cheng nuai 122.7 a tum ve bawk dawn a ni. UN Organisation pali - United Nations Development Programme (UNDP), United Nations Food & Agriculture Organisation (FAO), United Nations Indutrial Development Organisation (UNIDO) leh United Nations International Labour Organisation (ILO) te an tel dawn a ni. He Project in a tum bulpui ber chu ‘food security, livelihood security, energy and environment security,ecological balance, sustainable livelihood, income generation leh ecosystem venhimna atan mau hman tangkai, agriculture leh a kaihhnawih hman tangkai leh market linkage te an ni.

UN Team te hi 1. Ms.Lise Grande, UN Resident Coordinator 2. Ms.Ayumi Fujino,UNIDO Representative in India 3. Mr.Jaco Ciiliers, UNDP Country Director 4. Dr (Ms) Antonio Paliwal, FAO Senior Expert 5. Ms. Lianchawii Chhakchhuak, UNDP National Programme Officer 6. Sandeep Tandon, UNIDO Expert on Sustainable for All 7. Ms.Manjula Bhuyan, UNIDO Expert on North East Initiative leh 8. Ms.Mona Choudhuri, UN DSS te an ni.