Vawiin chawhnu khan ni 2 chhung chama Mizoram rawn tlawhtu United States of America palai, Eastern India leh North East bialtu Consulate General Pi Helen LaFave, American Consulate, Kolkata chuan Chief Secretary Pi L.Tochhong a kawm a. Nimin ah MSACS hotute kawm in chawhma khan Excise Department hotute a kawm hnu in CYMA hotute nen an inkawm bawk a ni. Vawiin tlai hian Synod puipate kawm leh in Chief Minister Pu Lal Thanhawla’n zanriah a kil pui ang.

Chief Secretary leh Consul General te inkawmna ah hian thawh hona tur kawng hrang hrang sawi a ni a. Heng thawh hona tura sawichhuah te hi Prime Minister Pu Narendra Modi in USA a tlawh tum a US President Pu Barak Obama nena India-US thawhhona thuthlung an ziahfel mil a zirchian leh a nih hnu ah a theihna apiang a bawhzui tum a ni. India Lookeast policy hnuaia Kaladan Multi-modal Transit Transport Project chungchang leh mau sumdawnna atana Mizoram in kalpui dan tur te an hriatchian duh thu sawiin tuna hmalak mek leh tihhlawhtlin tawh chin Chief Secretary hian a lo hrilh hriat a ni.

Pi LaFave chuan Mizoram Excise Department te hmalakna tha a tih thu Chief Secretary hi hrilh in MLPC chungchang a sawipui a, USA in prohibition a hlih chungchang leh an kalpui zel dan te a sawipui bawk a ni.

MSACS hotute nena an inkawmna ah Pi Helen LaFave chuan AIDS/HIV darh zel tur vena kawng leh positive-te enkawlna kawnga Mizoram Sawrkar hnathawh chu tha a tih tak zet thu a sawi a ni. CYMA office ah Central YMA hruaitute chuan Consul General hi lo kawm leh in YMA in Mizo khawtlang nuna a rawngbawl dan te hrilh in Mizoram tana hmasawnna kawng zawnna a thawhpui turin a sawm a. Cultural leh University exchange program rawtna te lo thlen in VISA dil chungchanga Mizo te harsatna sutkian sak turin an sawm a. VISA diltu Mizo tam zawk te chu cham hlen tum lem lo an nih avanga hriatthiamna nena lo dawngsawng thin turin an ngen a. Pi Helen LaFave chuan VISA diltu te an tehna hrang hrang a awm a chung zingah chuan Saptawng tawng thiam tak nih a pawimawhna te a tarlang a ni.

Pi Helen LaFave hian naktuk hian all India radio ah Interview a nei ang a. Hemi hnu hian Mizoram University tlawh in Zirlaite hma ah thu a sawi ang.