No.4378/2021-2022 

Aizawl the 23^rd March, 2022: Chief Minister Pu Zoramthanga chuan vawiin khan Mizoram Journalists' Associations (MJA) ten kum 50 tlin lawmna an buatsaihah khuallian niin a hmanpui. Golden Jubilee programme hi Dawrpui Multipurpose Hall-ah hman niin, Information & Public Relations Minister Pu Lalruatkima chu khualzahawm a ni. 

Chief Minister chuan Golden Jubilee lungphun a hawng nghal a. Kum 50 hmel MJA in a hmu chu a lawmpui thu a sawi a. Mizorama chanchinbu chhuak hmasa ber leh tunlai kan chanchinbu te khaikhin chuan a inthlau tawh hle in, hma kan sawn tawh hle tih a hriat a. Chutihrual chuan hmanlai kan chanchinbu te kha an hlu in, vawiin kan dinhmun hringchhuaktu a nih avangin a ropui hle a ni, a ti a. Vawiin jubilee lawmnaa hruaitu hlui kum tam tawh tak tak te’n an la uap zel thei chu ropui a ti a ni. Chief Minister chuan tunlai khawvelah print media mai nilo, electronic leh social media katlangin thu thar hrang hrang awlsam taka hmuh a thehdarh theih tawh a. A tanghkai em em rualin hman thiamloh chuan rah thalo tak chhuah thei a nih thu a sawi a. Inhuatna leh inhmuhthiamlohna chawkchhautu atana hman theih pah ni mahse, chutianga kan hman chuan keimahni bawkah a let theih thu a sawi a. Zoram tana tul, Zoram tana tangkai, ram tana hmel timawitu ah media hi kan hman a pawimawh a ni, Chief Minister chuan a ti a. Ram pawn atanga min rawn thlirtute tan Mizoram tarlangtu chu kan media-te hi a ni, tiin Zoram hlimthla - kan culture, kan society, kan sakhua, kan mipui leh ram rorelna te hi kan pholan dan azirin a mawi in a mawiloh theih thu a sawi a. Hemi kawngah hian journalist-ten mawhphurhna pawimawh tak an neih thu a sawi a ni. Chief Minister chuan journalist te hmakhua ngaihtuahin sawrkar pawhin theihtawp a chhuah thin thu leh a chhuah zel tur thu pawh a sawi  a ni. 

DIPR Minister Pu Lalruatkima chuan Souvenir "Press Club" tih leh documentary film "Zin Kawng" chu a tlangzarh a. Thu sawiin Mizoram Journalist Association in Golden Jubilee a lawm chu ropui a tih thu leh Journalist te huikhawmtu Information & Public Relations a chang chu lawmawm a tih thu Minister chuan a sawi a. Journalist te tun dinhmun thleng thei tura hun harsa tak tak paltlanga hma lo hruaitu, mual min liamsan tawhte chu vawiin hian kan theihnghilh lo a ni, a ti a. Minister chuan Journalist hna hi hna awlsam lo tak, hna zahawm tak niin, Journalist te hi khawvel ram tin hian a dah pawimawh em em thu a sawi a. Democracy ramah ngat phei hi chuan mipuite rilru kaihruai theitu pawimawh tak a nih thu leh India ram dan pui ah pawh Freedom of Speech and Expression chungchang tarlan a ni, a ti a. He dikna chanvo min pek rual hian Fundamental Duties (tih tur/mawhphurhna) min pe tel ve a. Miin a duh zawng zawng a ziak thei tihna a ni ngawt lova, kan thu ziah leh tarlan khan mi te tan natna (damage) a thlen em, tih te hi kan ngaihtuah fo a tha. Thu dik tawk lo thehdarh avanga midang hnena natna leh harsatna kan thlen hlauh a nih chuan, a hremna dan hi a awm zel tih hi kan hriat thar a pawimawh tak zet a ni, tiin sociam media chakna khawvel hian kan zavaia kan fimkhur tlan a pawimawh thu a sawi. Journalist-te chu sawrkar khalh ngiltu pawimawh an nih thu a sawi a. Thudik tantu nihtum thar turin leh, kan chanchinbu emaw a kan thu chhuah ten belhchian a dawl em, tih hi ennawn fo turin Minister chuan kalkhawmte a chah a ni.

DIPR Director Pi Lallianpuii chuan MJA Golden Jubilee Sash a tlangzarh a. Thu sawiin, MJA leh Department of Information & Public Relations chu kawng tam taka an hnathawh inzul tlat a nih avanga nodal department ah sawrkarin a dah thu a sawi a. Ram leh mipui rawngbawlna kawngah journlaist te'n mawhphurhna ropui tak an neih thu a sawi a. Thu dik nia an hriat, mipui hnena puanchhuah an duh avanga harsatna tawkte pawh an lo awm tawh thintu sawii, journalist te chu khawtlang nun siamthat kawngah te, ram inrelbawlna kawngah te an pawimawh in mawhphurhna an nei sangin, an huaisn pawh a ngaih thin thu a sawi a. Journalist te chu thuthar lakhawm a, thehdarh a, mipui zirtir tur an nih thu sawiin, news siamtu (newsmaker) nilo in puangzartu tur zawk an ni, a ti. DIPR Director chuan tunlai social media hmangtu tamna khawvelah thu belhchian dawllo tak tak thehdarh thin ni mahse Journalist te chuan heng social media a thu darhte hi a dik leh dikloh lo finfiahtu an nih tur thu a sawi a. Journalist te thuziak chu midang thuziak aia rintlak zawk a ni tur a ni, a ti.

Vawiin inkhawm hi MJA President Pu Zonunsanga Khiangte chuan a kaihruai a. MJA Golden Jubilee ah hian hruaitu hlui leh hruaitu ni mekte hnenah citation hlan an ni a. Prominent Journalist Pu Lalbiakthanga Pachuau chuan vawiin programme-ah hian hunserh a hmang a, MJA Vice President Pu Lalremsiama chuan lawmthu sawiin hun a khar a ni.

Naktuk hian MJA Conference neih chhunzawmin, kum 2022-2024 chhunga hruaitu thlanna neih a ni bawk ang.