Vawiin chawhnu khan Chief Minister leh Mizoram Journalists' Association dintu leh President hmasa ber lo ni tawh Pu Lal Thanhawla chuan Mizoram Journalists' Association, Serchhip District inkhawmpui vawi 10-na, Sub-Headquarters YMA Serchhip, Conference Hall-a an buatsaih chu  khuallian niin a hmanpui.

Chief Minister Pu Lal Thanhawla chuan MJA kum 1972 a tlawm taka bultan anih dante sawiin a hunlaia chanchinbu a enkawl leh hemi kawnga a inhman lai ngaituahin vawiina chanchinbu mite chu an changkang tawhin hman an sawn chak hle nia a hmuh thu a sawi a. Press leh chanchinbu mite pawimawhna sawiin mipui rorelna sawrkar democracy ah hian executive, legislature leh judiciary te bakah Press hi lungthu palina (Fourth Estate) a ngaih a ni a, hemi avangin hian chanchinbu mite ko ah ram leh hnam siamna kawngte, mipuiin thu kal lam haw lam an hriatna ber kawnga te, mipui kaihhruai leh zirtir kawnga te leh thu dik leh tha puanchhuahna kawnga te mawhphurna lian a fu a, Sawrkar khalhngiltu leh mipui ten thudik an hriatna kawnga mawhphurna lian tak in nei tih hi in hriat ber ni mahse inhriatnawm fo hi a pawimawh a ni, a ti.

Chanchinbu mite chu thil leh thu chik turah chahin kan beng te kan chhit a, thu leh hla kan ngaihtlak tam a, kan inchhiar zau a ngai hle a. Thil kan chik theihna turin Sap tawngin Who(tunge), What(enge), Where(khawi ah nge), Why(enga tinge), When(engtik ah nge) leh How(eng tin nge a) a tih te hi kan ngaihtuah a, kan hnathawh leh kan thuziak te a rintlak turin hengte hi kan ngaihpawimawh a tul a. Mizo te hi chhiar hnam kan ni a, kan thuziah te hi constructive (a tha lam hawi), educative (zirtir nei) leh innovative (ngaihtuahna thar min tuhsak) thei a nih a pawimawh a hemi kawngah hian chanchibu darhzau te phei chu in fimkhur leh zual a ngai a. Mipui te hi thudikin inchawm tur a ni a, a tulnaah leh a hunah chuan Sawrkar pawh in khak tur a ni a, a sawiselna turah a tha lama insawiselna (constructive criticism) hi kan ngaihpawimawh a tul a ni,  a ti a. Chanchinbu mite chu an thiamna leh theihna te chu Zoram nun siam that kawngah leh kawng tin renga mipui an fihlim theih nan vengtu tha tak ni turah chahin hmasawn zel tur kan nih ti hre renga an kal zelna turah a duhsakna hlan a. He hunah hian Journalists' Welfare Fund tihpun dilna chu tihhlawhtlin a nih tur thu a sawi bawk a ni.

MJA Serchhip District Annual Conference, Second Session hi Pu C. Ramengmawia, Vice President in kaihruaiin General Secretary Pu Zonunsanga Kawlni chuan Report a tarlangin kum kalta an hma lakna te a sawi a. MJA Serchhip District President Pu C. Lalhminghlua leh MJA General Headquarters aiawha he Conference hmanpuitu General Secretary Pu C. Lalhmachhuana te pawhin thusawina hun an nei bawk a ni.