Sawrkar laipui hmalakna a rulhut tihbo na tura beihpui thlakna Ni, ‘National Deworming Day 2017’ chu ramchhung hmun dangte rualin vawiin khan Lungleiah pawh Sacred Heart School Auditorium ah hman a ni.
Lungleia National Deworming Day 2017 hmannaah hian Dr. Lalawmpuia Chhangte, Senior Medical Officer, District Hospital, Lunglei chuan National Deworming Day hman chhan leh mihring tana rulhut pai hlauhawm dan te chipchiar takin a sawi a. Rulhut pai avangin thisen tlakchham leh thluak lam hrisel lohna a thlen thei tiin, rilru chak lo leh taksa pian hmang a tih danglam bakah natna dang dang a thlen theih thu a sawi a. Hemi laka naupangte an fihlim theih nan nu leh pa, pi leh pute bakah zirtirtute'n theihtawpa rulhut tibo tura thahnem an ngaihpui a tul thu a sawi a ni.
National Deworming Day hi Lunglei khawpui bakah District chhunga Sub-District Hospital, Public Health Centre leh Community Health Centre ah te pawh hman a ni a. He Ni denchhen hian Lunglei District chhunga sikul hrang hrang leh Anganwadi Centre hrang hranga sem turin rulhut damdawi (Tab. Albendazole) mum 50,000 chuang semchhuah a ni bawk. National Deworming Day hi Mizoram district zawng zawngah a ruala hman niin, naupang kum 1 leh kum 19 inkar sikul kai leh kailo, sawrkar leh private sikul naupangte rulhut damdawi a ruala eitir an ni.
