Nimin chawhnu khan Finance Minister Pu Lalsawta chuan MIzoram Food Processing Research & Training Centre(MFPRTC), Phaibawk, Seling ramchhunga mi a tlawh a. Hemi hnuah hian BNRGSK HALL, Seling-ah NEDP chungchang sawipuiin Seling khawtlang hruaitute nen inkawmna hun an hmang.

Finance Minister Pu Lalsawta chuan Mizoram Food Processing Research & Training Centre(MFPRTC) hmunah hian thlai leh theirah silfaina, vawn thatna, hersawmna leh a tuia sawrna hmun te a tlawh a. Laboratory, class room, office, mipa hostel leh hmeichhe hostel te a endik nghal.  NEPD hmalakna hnuaia entrepreneurship training bika kuthnathawktu te leh zirlai te tana Ei leh in sawngbawl zirna hmun pakhat atan MFPRTC chu  hman tlak dawn em tih enthlithlaina MFPRTC chu tlawh a nih thu Minister hian a sawi a. MFPRTC dintu, Pu Joseph L Ralte leh faculty ten Finance Minister hi an hmunhma leh an khawl neih te an tlawh kual pui a. Dr. H.Saithantluanga, Jt.Director, Agriculture leh Dr.Lalrinchhana, Dy. Planning Adviser, Planning bakah official ten MInister hi an tawiawm a ni.

BNRGSK HALL-a Seling khawtlang hruaitute a kawmnaah Finance Minister Pu Lalsawta chuan Zoram mipui ten an dinhmun ngaiah kum 40 chhung an awm hnu in hmasawnna rahbi lian zawk an neih theih nan New Economic Policy(NEDP) chu kalpui leh ruahhman a nih thu a sawi a. "Mizo mipui te hian ei leh bar, intodelhna kawng leh kan eizawnna kawnga kan hmalaknaah te hian pawl 12 kan pass na a rei tawh a, kum 40 chhung vel chu pawl 12 pass ni siin graduate course ah admission lak kan tum miah lova, hmathar lain NEDP hmangin hausakna tin renga hualvel, tun thlenga la harsa si te hian ke kan pen a ngai a ni', a ti. "Tuna kan dinhmun dik tak chu, kan mamawh zawng zawng za zela pariat hi kan thawh chhuah, a bak za zela sawmkua pahnih hi Central sawrkar puihna a ni a. State dang hruaitute nena intawhkhawm nikhua ah pawh kan state thawhchhuah zawhna chhan hi thil huphurhawm a ni fo thin. Mahse, kan state hi state hausa leh awlsamna tam tak nei a nih avangin NEDP hmang hian kan dinhmun hi a thlak theih tih erawh kan hriat a; tih tak takna nen hmathar kan lak a ngai dawn a ni", a ti. Agriculture sector ah pawh,  beneficiary hnenah tanpuina sum pek ang kha kalpui a rem tawh loh tur thu a sawi a. NEDP chuan kuthnathawktute training thazawk pek, sumdawnna kawnghmang zirtir, an tharchhuah awlsam zawka hralh dan kawhhmuh, an thlaithar te dahthatna hmun(cold storage) hmun remchangah te siamsak, thlai leh thei sawngbawldan zirtir bakah thlai huan/thlawhma panna kawngpui thazawk  siam sak te a a tum dawn a ni a ti.