60MW pe chhuak thei tura ruahman Tuirial Hydel Project chu hman theih tura hna thawh zawh hnaih a nih tawh thu he Project enkawltu North Eastern Electrical Corporations Limited (NEEPCO) hotuten a hmun a tlawh tu Pu Lal Thanzara, Minister H&FW, I&PR etc. an lo hrilh.

Pu Lal Thanzara chuan he Project a hmun ngeia a tlawh thei chu lawmawm a tih thu sawiin, hna tha tak an thawh hmuh tur a awm chu a lawmawm lehzual a ni a ti a. Minister chuan hna thawktu ten ruahman anga hna tha taka an zawh theih nan duhsakna a hlan a. Hnathawktu ten a hmun ngeia Minister in a tlawh chu lawmawm an tih thu leh tiphurtu tha tak anih thu an sawi a ni.

Tuirial Hydel Project hi khawvel a lei a chhung muk (earthen) Dam sangber pahnihna niin, India ramah chuan pakhatna a ni a. Dam san zawng hi 97m a ni. Tuirial Hydro Electric Project-ah hian Split gate 3, turbine 2 leh tunnel 2 a awm a. He Dam hi unit hnih a then niin, unit 1 hian 30MW ve ve a pechhuak thei dawn a ni.

Tuiin a chim chin thui zawng hi 45km a ni a, tuikhuahna pui ber (main dam) atang Aizawl thleng tur hi 85km a thui a ni dawn a ni. Tui khuap chim chin hi tunah 51.8m a thuk a ni mek a, 68m chen a chim hunah hman tan theih tura duan a ni a. Tui chim chin san theih ber zawng hi 97m a ni. Tui khuap hi nitin 2 inches in a san chhoh zel thu thawktu ten an sawi a ni.

Ruahman anga thil a kal chuan Unit 1 hi kumin June-ah hawn hman tum a ni a, unit pakhat dang hi kumin vek September hian hawn hman tum a ni bawk. Tunah hian a sak hna hi 98% vel zawh a ni tawh a, remkhawm hna thawh mek a ni a. Thawktu te chuan hmanrua an mamawh ang te an lakkhawm kim tawh thu sawiin, tunah chuan a remkhawm leh chulmam hna an thawk mek a ni an ti a. He project a hman tur Hydrolic Cylinder 6 chu Italy atanga chah thlen anih tawh thu an sawi bawk.

Cabinet Committee on Economic Affairs chuan he 60MW Tuirial Hydro Electric Project siam nan hian kum 2010 khan Rs.913crore a phalsak a. Hun engemaw chen harsatna neuh neuh avanga chhunzawm theih loh a nih hnu in, kumin a hawn hman ngei tumin chak takin hmalak mek a ni.

He hna enkawltu NEEPCO te chuan he hydel project hian Mizoram chu electric power a ti hnianghnar mai nilovin, project tha tak siam thiam chuan tui hmanga inkalpawhna tha tak, sangha khawi hmasawn nan bakah khualzin hiptu tha tak anih theihtu an sawi a. Hei hi Minister chuan ngaihtuah zui chi anih thu a sawi a ni.

He project hi North Eastern Electrical Corporations Limited (NEEPCO) in enkawlin anni enkawlna hnuaiah hian Patel Engineering ten a sak hna hi an thawk a ni.

Minister hi Pu Lalhmachhuana, Secretary P&E, Pu Lianlunga, SE Aizawl Power Circle, Pu PC Lawmsanga, IPS(Rtd) consultant leh Kolasib DIPRO ten an tawiawm a ni.