Administrative Training Institute (ATI) leh Deputy Commissioner Office Kolasib buatsaihin ni 12 awh tur Kolasib a sorkar hnathawkte tan Induction Training Programme chu vawiin khan District Information & Public Relations Office, Kolasib Conference Hall-ah hman tan niin, District Bawrhsap Pu H.Lalengmawia'n a hawng.

Hawnna inkhawmah Pu H.Lalengmawia chuan sorkar hnathawkte tan intuaithar fo hi a pawimawh a ni tiin, hemi atan hian training a kal tam a tul a ni a ti a. Sorkar hnathawkte mipui tana rawngbawl kan ni tih inhre fo ila, mipui tana dawr nuam leh inlaichinna tha tak siama hnathawk tur kan ni tih inhriat fo a pawimawh a ni a ti a. Kan hna in a ken tel kan hriat tur pawimawh hrang hrang; office inkaihruaina dan, mipui chhawn dan, inlaichinna tha siam dan; bakah Department dang hnathawh dan te kan inhriatpui tawn hi a tul a, hei hian kan hnathawhna kawngah pawh min pui ngei dawn a ni a ti a. Training tura kal zawng zawng te a hming mai a training lo a, inzir tak tak a hlawkpui ngei tur leh an thil hriat te hmang zui nghal thei tur a la thutak turin a chah a ni.

Training-ah hian Sorkar Department thenkhat te hnathawh dan te leh sorkar scheme kalpui dan te, inlaichinna tha siam dan te, thutlukna tha siam dan te, RTI chungchang te, e-governance chungchang te, digital india chungchang te, file vawn dan dik te leh office inkaihruaina dan te zir a ni dawn a ni. Training hi vawiin 13th February atangin 24th February thleng neih a ni ang.