Vawiin hian Serchhip DC Pisa ah Bawrhsap Dr. Lalrozama, IAS, District Planning and Monitoring Committee (DPMC) on Article 275 (1) Chairman ni bawk hovin District Planning and Monitoring Committee on Article 275 (1) member te an thukhawm a, kum 2016-17 chhung atana Serchhip District Tribal Sub Plan (TSP) siam dan tur an sawi ho. 

Chairman Dr. Lalrozama chuan, Scheduled Tribe te tanpuina atan Consolidated Fund of India atangin Grants-in-aid chheh hran theihna dan, India danpui Article 275(1) ah siam a ni a, chumi behchhan chuan sawrkar laipui chuan Ministry of Tribal Affairs kal tlangin Scheduled Tribe awmna State ah kumtin tanpuina a ruahman thin. Tun sawrkar kum kal mekah pawh Mizoram tan engemawzat dah ve leh niin Serchhip District tan bik pawh Rs 151.29 lakhs vel ruahman a ni, a ti a. Heng sum ruahman te hi Central lam duhdan angin mipuite dawmkanna kawng hrang hrangah hman tur a ni a ti a. Vawiina kal khawm member Department te chu an pawisa hmuh turte District tana thil tangkai leh mipuite dawmkanna tling ngei ruahmanna siam nan hman tum theuh turin a chah a ni. 

Serchhip District a he Article 275(1) sum hman theihna tur kawng te chu Education, Health, Agriculture, Horticulture, AH & Vety, Fisheries, Industries, Social Welfare leh Sports lam te an ni a, heng kawng hrang hranga hmalak dan tur ruahmanna hi a khawitu tur Department ten an buatsaih nghal anga, tunkar tawp lam hian thlir ho leh a ni ang. District Plan (Tribal Sub Plan) hi peih a nih veleh State thuneitute hnenah thehluh leh tur a ni ang.