Vawiin khan Chief Minister Pu Lal Thanhawla chuan ramchhung Central leh State Civil Services te huapa Badminton inelna All India Civil Services Badminton Tournament 2017, Central Civil Services Cultural and Sports Board in an buatsaih chu Dengthuama Indoor Stadium ah khuallin niin a hawng.

Chief Minister Pu Lal Thanhawla chuan Central Sawrkar leh state sawrkar hrang hranga sawrkar hnathawk he inelnaa rawn telte chu lawmin Mizoramin a vawi 4-na atan he inelna a thleng chu lawmawm a tih thu a sawi a. Inter Ministry inelna te hian sawrkar hnathawkte inkarah inlaichinna leh inthianthatna tha a thlen thin a ni, a ti a. Mizoram chu state naupang a nih avangin infiamna hmunhma te chu an beisei phak leh an duhthusam a tlin loh pawhin kan khual thatna hi min ngaihhlut sak dawn a ni tiin a sawi a. Tunlai khawvel buai chho zelah hun chep tak karah pawh infiamna leh taksa insawizawina atan hun siam a that thu sawiin infiamna hmangin taksa mai bakah rilru hrisel kan siam thei a, hei hian kan nitin hnathawhna kawngah pawh thui tak min pui thei a ni, a ti a. Hriselna tha mai bakah infiamna leh sports hian tha taka inzawmkhawma hnathawh (teamwork) dan te, midangte hruaikhawma hnathawh theihna te, goal thuhmun neia hnathawh dan te, midang rinkaina (trust) leh mawhphurna chungchang te, hlawhtlinna leh hlawhchhamna dawnsawn dan te min zirtir thei a ni, a ti. Sawrkar hnathawk infiammite chu hun duhawm tak hmang tura a duhsakna, sportsmanship spirit neia inelna hi hmachhawnturina chah a ni.

He hun hmanpuitu dang Sports Minister Pu Zodintluanga pawhin thusawiin infiammite hun tha tak leh lawmawm tak hmang tura chahin hlawhtlinna an neih theih nan duhsakna a hlan a. Parliamentary Secretary Pu Hmingdailova Khiangte leh Lt. Col. (Rtd.) ZS Zuala te pawh he programme ah hian an tel a ni.

Chief Secretary leh Chairman, Organizing Committee, AICS Badminton Tournament, Pu Lalmalsawma chuan Tournament hawnna inkhawm hi kaihruaiin inlawmna thu a sawi a. Tum hnih lai Olympics ah India aiawh a tel tawh thal kahthiam, Sports & Youth Services Department a Chief Coach ni mek Pu R. Lalremsanga’n Team Captain te hi thu a tiam tir a ni.

AICS Badminton Tournament 2017 ah hian State leh UT hrang hrang 31 atangin sawrkar hnathawk infiammi 380 vel an tel a. Mipa team 34 leh Hmeichhe team 25 an tel a. Mizoram hian AICS Tournament hi kum 1997, 2004 leh 2012 ah te a lo thleng tawh a ni.